Rabitə və İnformasiya Texnologiyaları Nazirliyindən bildirmişlər ki, nazir Əli Abbasovun başçılığı altında nümayəndə heyətinin oktyabrın 8-9-da Kubanın paytaxtı Havanaya səfəri planlaşdırılır.
Nümayəndə heyətinə yerli informasiya texnologiyaları şirkətlərinin nümayəndələri də daxil olacaqdır. Kubanın informasiya və rabitə naziri Ramiro Valdes Menendesin dəvəti ilə keçirilən səfər çərçivəsində bir sıra görüşlərin keçirilməsi, həmçinin iki ölkə arasında informasiya və kommunikasiya texnologiyaları sahəsində əməkdaşlıq haqqında sazişin imzalanması planlaşdırılır.
Həmin günlər Havanada, həmçinin telekommunikasiya və informatika üzrə birinci Kuba-Azərbaycan biznes forumu keçiriləcək və ölkənin İnformatika Elmləri Universitetində Azərbaycan milli kompyuter istehsalçılarının hədiyyəsi kimi kompyuter auditoriyasının açılışı olacaqdır.
AzərTAc{nl}