ATƏT-in Minsk qrupunun həmsədrləri Bernar Fasye (Fransa), Robert Bradke (ABŞ) və İqor Popov (Rusiya), eləcə də ATƏT-in sədrinin şəxsi nümayəndəsi Anji Kaspşik sentyabrın 23-də Nyu-Yorkda BMT-nin Baş Məclisi çərçivəsində Azərbaycanın və Ermənistanın xarici işlər nazirləri Elmar Məmmədyarov və Edvard Nalbandyanla ayrı-ayrılıqda görüşmüşlər.
Bu barədə ATƏT-in rəsmi saytında dərc olunmuş Minsk qrupunun bəyanatında deyilir.
Bəyanatda bildirilir ki, həmsədrlər nazirləri oktyabrın 4-dən 14-dək Dağlıq Qarabağın ətrafındakı ərazilərə səfər edəcək qiymətləndirmə missiyasının hazırlığı barədə məlumatlandırmışlar.
Bundan əlavə, sənəddə qeyd olunur ki, həmsədrlər BMT-nin Cenevrədəki və Nyu-Yorkdakı nümayəndələri ilə özlərinin qurduqları ilkin əlaqələrə əsaslanaraq, BMT-nin İnkişaf Proqramının və Qaçqınlarla İş üzrə Ali Komissarlığının ekspertlərinə missiyada iştirak etmək xahişi ilə rəsmi müraciət etmişlər.
Həmsədrlər nazirləri ATƏT-in Astanada keçiriləcək sammitinə hazırlıq və iş planları ilə tanış etmişlər.
Azərbaycanın təşəbbüsü ilə ATƏT-in qiymətləndirmə missiyası hazırda Ermənistanın işğalı altında olan Azərbaycan ərazilərindəki vəziyyəti öyrənir. ATƏT-in Minsk qrupunun həmsədrləri son səfərləri zamanı bu ərazilərdə vəziyyətlə tanış olmuşlar. Vasitəçilərin Azərbaycanın işğal altında olan ərazilərindəki vəziyyətlə bağlı hesabat hazırlayacaqları gözlənilir.{nl}