Əmək və Əhalinin Sosial Müdafiəsi Nazirliyi və Baş Məşğulluq İdarəsinin tədbirlər planına uyğun olaraq Zaqatala şəhərində növbəti əmək yarmarkası keçirilmişdir. Rayon Mədəniyyət evində təşkil olunan yarmarkanın açılışında Zaqatala Rayon İcra Hakimiyyəti başçısının sosial-iqtisadi məsələlər üzrə müavini H.Süleymanov, Məşğulluq Mərkəzinin direktoru Əsəbömər Musayev və Əhalinin Sosial Müdafiəsi Nazirliyi Baş Məşğulluq İdarəsinin məsul nümayəndəsi Ülvi İsmayılov iştirak etmişlər.
Tədbirdə çıxış edən natiqlər Azərbaycan Respublikası Prezidenti İlham Əliyevin rəhbərliyi ilə ölkəmizdə işsizlik probleminin həlli istiqamətində önəmli layihələrin həyata keçirildiyini, dünyanı bürümüş qlobal maliyyə böhranına baxmayaraq respublikamızda yeni iş yerlərinin yaradıldığını qeyd etmiş, bu tədbirlərin əmək qabiliyyətli qeyri-məşğul əhalinin sosial müdafiəsini gücləndirmək və onların işlə təmin olunmasına kömək məqsədi daşıdığını bildirmiş, yarmarkanın işinə uğurlar arzulamışlar.
Yarmarkada rayonda fəaliyyət göstərən 28 idarə, müəssisə və təşkilatlardan 286 boş iş yeri təklif olunmuşdur. İş yerləri üçün təklif olunan əmək haqqının məbləği 85 manatdan 200 mantadək təşkil edilmişdir.
Zaqatala fındıq zavodu, Mərkəzi Rayon Xəstəxanası, "Resnut" və "Drujba" MMC-ləri yarmarkaya daha çox iş yerləri çıxarmışlar. 300-dən artıq işaxtaran vətəndaşın iştirak etdiyi yarmarkanın yekununda 102 nəfər işə göndəriş əldə etmişdir. Bundan əlavə 12 nəfər peşə hazırlığı kursuna, 10 nəfər isə ictimai işlərə cəlb edilmişdir.

İ.MUSAOĞLU, "Xalq qəzeti"nin bölgə müxbiri