Azərbaycan Respublikasının Prezidenti  cənab İlham Əliyevin  sərəncamı ilə təsdiq olunmuş “2010- 2014-cü illərdə  Azərbaycanda turizmin inkişafı ilə bağlı  Dövlət Proqramı”nın icrası  başa  çatmaq üzrədir. Bu istiqamətdə  Dövlət Proqramına  uyğun olaraq həyata keçirilən tədbirlər onu deməyə əsas  verir ki,  ölkəmizdə  turizm  sürətli inkişaf yoluna çıxmışdır.

Dövlət Proqramının  prioambulasında  deyilir ki, turizm öz perspektivliliyinə görə qeyri-neft sahələri arasında aparıcı mövqelərdən birini tutur. Hazırda turizm planetar miqyasda sürətlə inkişaf edən biznes sahələrindəndir. Dünya üzrə ümumi milli məhsulun 10 faizi, ixracatın 8 faizi beynəlxalq turizmin payına düşür, göstərilən xidmətlərin təqribən üçdə biri beynəlxalq turizm vasitəsilə həyata keçirilir. Dünyada əmək qabiliyyətli əhalinin 8,1 faizi turizm industriyasında və onunla bağlı iqtisadiyyat sahələrində məşğuldur. Bu,  cox  əhəmiyyətli  faktdır  və Azərbaycan da  bu sahədə əhəmiyyətli addımlarını atmaqdadır.

Turizmin  gələcək inkişafı üçün  Azərbaycanda hər  cür şərait mövcuddur. Azərbaycanın füsünkar təbiəti, zəngin tarixi və  mədəniyyət abidələri bu sahənin  tərəqqisi   üçün   güclü  stimul yaradır. Ölkə başçısının daim diqqət mərkəzində olan turizm  sahəsi  qeyri-neft  sektorunda  mühüm yer tutur. Heç təsadüfi deyil ki, 2011-ci ili cənab Prezident ölkədə  “Turizm ili” elan etmişdi.

Azərbaycan dövləti turizm sahəsini iqtisadiyyatın qeyri-neft sektoru üzrə prioritet istiqamət elan etmişdir. Son illər turizmin təşviqi ilə bağlı görülən işlər, qəbul edilən dövlət proqramları, normativ-hüquqi bazanın təkmilləşdirilməsi bunu bir daha sübut edir.

Dünya turizm məkanına uğurla inteqrasiya olunan, bu sahədə beynəlxalq əlaqələrini genişləndirən Azərbaycan 2013-cü ilin avqustunda daha bir nailiyyətə imza atmışdır. Afrikanın Zambiya və Zimbabve respublikalarının birgə təşkilatçılığı ilə keçirilən BMT-nin Dünya Turizm Təşkilatının (UNWTO) XX Baş Assambleyasında Azərbaycan qurumun icraiyyə şurasının üzvü seçilmişdir. Avropa qitəsinin 4 dövləti (Azərbaycan, Almaniya, Serbiya və Bolqarıstan) sırasından Azərbaycanın üzvlüyü 25 səslə birinci olaraq seçilmişdir.

Azərbaycanda  keçirilən  beynəlxalq tədbirlər turizmin inkişafına öz müsbət təsirini göstərir. Bakı şəhərində keçirilmiş İkinci Ümumdünya Mədəniyyətlərarası Dialoq Forumu III Bakı Beynəlxalq Humanitar Forumunu və s. buna misal göstərmək olar. Bu tədbirlərin  keçirildiyi vaxtlarda   qonaqların asudə vaxtlarının səmərəli təşkili məqsədilə Bakıda  təşkil olunan “Şəhər Turu” (CityTour) layihələri   iştirakçıların böyük marağına səbəb olmuşdur.

Dövlət Proqramı  çərçivəsində ölkəmizin turizm potensialı Almaniya, Yaponiya, Fransa, Böyük Britaniya, İspaniya, Polşa, Ukrayna, Türkiyə və digər ölkələrdə keçirilən beynəlxalq turizm sərgilərində icarəyə götürülmüş pavilyonlarda, müxtəlif dillərdə hazırlanmış çap məhsulları vasitəsilə təbliğ olunmuşdur.

Artıq ölkəmizin bu sahədəki uğurları beynəlxalq təşkilatlar tərəfindən qiymətləndirilir və dəstəklənir. Azərbaycanın turizm imkanları “LaRepublica” və “Messaggero” qəzetlərində, “Business Year” və “ABTA” jurnallarında təbliğ olunmuşdur. Bu dövr ərzində ölkəmizin turizm potensialını əks etdirən reklam çarxları “CNN”, “Euronews”, “TV5 Monde”, “Rossiya 2”, “Moya planeta” telekanallarında nümayiş olunmuşdur.           Ölkəmizdə Avropa İttifaqı tərəfindən maliyyələşdirilən “Tvinniq” layihəsinin icrasına başlanılmışdır.  Bu il də layihənin icrası davam etdirilmişdir. Təkcə ötən ilin yekunları belə bir qəti fikir söyləməyə əsas verir ki, ötən illərdə olduğu kimi, 2014-cü ildə də Azərbaycan bənzərsiz turizm imkanları ilə dünyanın diqqət mərkəzindədir.

Dövlət Proqramının icrasını təmin etmək məqsədilə ölkəmizin bütün bölgələri üzrə “Kulinariya Turu” mədəni turizm marşrutlarının yaradılması planlaşdırılmışdır. İlkin mərhələdə Quba rayonunda Quba rayon mədəniyyət və turizm şöbəsi, Milli Kulinariya Mərkəzi və “Vitory Tour” turizm şirkətinin təşkilatçılığı ilə “Kulinariya Turu” adlı mədəni turizm marşrutu üzrə infotur keçirilmiş və marşrut pasportlaşdırılmışdır.

Bununla yanaşı, nazirliyin dəstəyi ilə İsmayıllı Rayon Mədəniyyət və Turizm Şöbəsi, Lahıc İnformasiya Mərkəzi, AMEA-nın Folklor İnstitutu, “Millennium Turizm Kongress” turizm şirkəti tərəfindən “Qırx otaq əfsanələri” və “Fit dağ əfsanələri” adlı mədəni və ekoturizm marşrutları üzrə  turizm şirkətlərinin və KİV-in nümayəndələrinin iştirakı ilə infotur keçirilmiş və marşrut pasportlaşdırılmışdır. Şahdağ turizm kompleksi ətrafında  görülmüş işlər, kompleksin istifadəyə tam yararlı vəziyyətə gətirilməsi üçün  hazırlıq işləri aparılmışdır. Belə ki, Almaniyanın Donau Finanz şirkəti tərəfindən hazırlanmış marketinq planı üzrə təhlil aparılmış və Şahdağ qış-yay turizm kompleksinin və Azərbaycanın bölgələri üzrə marketinq planları hazırlanmışdır.

 Xarici ölkələrlə  turizm əlaqələri qurulması istiqamətində  aparılan işlərin miqyası xeyli genişlənmişdir. İkitərəfli və çoxtərəfli əməkdaşlıq   bu sahədə öz müsbət nəticələrini  verməkdədir. Çoxtərəfli  əməkdaşlıq münasibətlərinin qurulması və inkişaf etdirilməsinin turizm siyasətinin prioritet istiqamətlərindən biri olduğunu nəzərə alaraq Mədəniyyət və Turizm Nazirliyi Ümumdünya Turizm Təşkilatı (BMÜTT), Avropa Şurası, İslam Konfransı Təşkilatı (İKT), Müstəqil Dövlətlər Birliyi (MDB), Demokratiya və İqtisadi inkişaf naminə - GUAM, Qara Dəniz İqtisadi Əməkdaşlıq Təşkilatı (QDİƏT), İqtisadi Əməkdaşlıq Təşkilatı (İƏT) və s. beynəlxalq təşkilatlarla turizm sahəsində əməkdaşlığın təşkil edilməsi, mövcud proqramlara qoşulma, beynəlxalq tədbirlərdə fəal iştirakın təmin edilməsi, həmçinin yeni təklif və layihələrin hazırlanması, əməkdaşlığa dair sənədlərin imzalanması istiqamətində səmərəli və mühüm fəaliyyətini davam etdirir.

Bakı şəhərində Azərbaycan Respublikası Mədəniyyət və Turizm Nazirliyi, Ümumdünya Turizm Təşkilatı (BMÜTT) və Azərbaycan Turizm Assosiasiyasının birgə təşkilatçılığı ilə “İpək Yolunun tamı: Kulinariya, Mədəniyyət və Turizm” adlı beynəlxalq konfrans keçirilmişdir. Konfransda  bir neçə ölkənin nümayəndələri iştirak etmişlər.

Bakıda “AİTF” Azərbaycan Beynəlxalq  Turizm və Səyahətlər sərgisi  keçirilmişdir.  “AİTF-2013” sərgisində 35 ölkədən 60-dan çox istiqaməti təmsil edən 251 şirkət iştirak edirdi. Sərgidə bir çox ölkələrin milli stendlərinin fəal iştirakı artıq ənənəyə çevrilmişdir. Sərgidə  20 stend öz milli ekspozisiyası ilə iştirak etmişdir. Onların arasında sərginin daimi iştirakçıları olan Türkiyə, Rusiya, Gürcüstan, Bolqarıstan, Kipr, Çexiya, Birləşmiş Ərəb Əmirlikləri, Sloveniya və Misirin milli qrupları vardır. Fransa, Macarıstan, İndoneziya, İran, Monteneqro, Mərakeş, Ukraynanın Krım Muxtar Respublikası, Tailand və Tunisin milli qrupları isə bu il ilk dəfə sərgiyə qatılmışlar. Mədəniyyət və Turizm Nazirliyi   bu il  20-yə yaxın beynəlxalq turizm sərgisində iştirak etməyi planlaşdırmışdır. Onlardan  onunda artıq  ölkəmiz iştirak etmiş  və Azərbaycanı  geniş miqyasda təbliğ  etmək mümkün olmuşdur.

Yeni mehmanxanalar inşa edilir, əvvəlkilərdən bəziləri təmir olunaraq yenidən istifadəyə verilir, turistlərin  rahat istirahəti üçün   gözəl şərait yaradılır. Bu  gün Azərbaycana  gələn  turistlər  böyük  razılıq hissi ilə  buradan  ayrılırlar. Turistlər üçün yaradılan  şərait  onların  yenidən  Azərbaycana   turist kimi  dönmələrinə imkan yaradır. Əgər inkişaf bu templə davam etsə,  yaxın  gələcəkdə  Azərbaycana turistlərin axını daha  da sürətləncək.

M.MÜKƏRRƏMOĞLU, “Xalq qəzeti”