Yekaterinburqda "Azərbaycana aparan yol" adlı layihə yaradılır və peyk vasitəsilə Sibirə və Uzaq Şərqə yayımlanacaqdır.
AzərTAc "Rossiyskaya qazeta" ya istinadla xəbər verir ki, gələcəkdə Rusiyanın Avropa hissəsinə və Orta Asiya ölkələrinə də yayım nəzərdə tutulmuşdur.
Proqramı hazırlamaq üçün Bakıdan Yekaterinburqa mütəxəssislər qrupu getmişdir. Teleproqramın aparıcısını isə Azərbaycanın Yekaterinburqdakı baş konsulu Sultan Qasımov seçmişdir. Müasir Azərbaycanın həyatı barədə proqramı Sverdlovsk Akademik Musiqili Komediya Teatrının solisti Anatoli Brodski aparacaqdır.
S.Qasımov demişdir: "Onun namizədliyi mədəniyyətlərarası əlaqələri nümayiş etdirir. Brodski əslən Azərbaycandandır, Rusiyada isə yaşayıb-yaradır".
Proqram hələlik yalnız rus dilində hazırlansa da, bu fakt Uraldakı Azərbaycan diasporunun nümayəndələrini (50 min nəfər) bir o qədər narahat etmir. Azərbaycan ictimai təşkilatının rəhbəri Niyaz Vəliyev demişdir: "Biz 10 il müddətində televiziya ilə öz tarixi vətənimiz barədə danışmaq imkanını əldə etməyə çalışmışıq".