Aprelin 12-də Azərbaycan Tibb Universitetinin rektoru, Milli Məclisin deputatı, akademik  Əhliman Əmiraslanov Saatlı rayonundan olan seçiciləri ilə görüşmüşdür.

Universitetin mətbuat xidmətindən bildirmişlər ki, görüş zamanı Əhliman Əmiraslanov  son illər bölgələrdə, o cümlədən Saatlıda aparılan quruculuq işlərindən, əhalinin sosial vəziyyətinin yaxşılaşdırılması istiqamətində həyata keçirilən tədbirlər və nəzərdə tutulan yeni layihələr barədə danışmışdır.

Daha sonra rayonun Varxankənd, Dəllər, Yeni Novruzlu, Musabəyli, Bəyli və digər kəndlərdən olan seçicilərin səhhətlərində üzləşdikləri problemlər, həmçinin orta məktəblərin sosial problemləri, ali məktəblərdə ödənişli təhsil, suvarma, qaz və digər məsələlərlə bağlı müraciətlərinə baxılmışdır.

Şəkərli diabet, göz, oynaq xəstəliklərinin müayinəsi və müalicəsi, bundan əlavə, bir neçə nəfərin, o cümlədən onkoloji xəstəliyi olan seçicinin  pulsuz əməliyyat olunması ilə bağlı konkret tapşırıqlar verilmişdir.

AzərTAc