Azərbaycan Müəllimlər İnstitutu Qazax filialının müəllim və tələbələri son zamanlar vaxtaşırı hərbi hissələrdə olur, sərhədlərimizin keşiyini çəkən əsgərlərə baş çəkir, maraqlı və rəngarəng tədbirlər təşkil edirlər.

Bu günlərdə filialın bir qrup üzvü “N” saylı hərbi hissəyə getmişdir. Müəllim və tələbələr əsgərlərin şəraiti ilə yaxından tanış olmuş, onların arzu və istəklərini dinləmiş, gətirdikləri bayram sovqatını paylamış, maraqlı konsert proqramı ilə çıxış etmişlər. Əsgərlər qonaqlarla birgə rəqs etmiş, öz döyüş bacarıqlarını nümayiş etdirmişlər.

Filialın direktoru, dosent Afaq Qasımova zabit və əsgərlər qarşısında çıxış edərək demişdir ki, bu gün doğma torpaqları qorumaq kimi müqəddəs bir vəzifə sizin üzərinizə düşür. Ali Baş Komandanımız cənab İlham Əliyevin yürütdüyü daxili və xarici siyasət, ölkəmizin qüdrətinin daha da möhkəmləndirilməsi bizi əmin edir ki, zəbt olunmuş torpaqlar tezliklə geri qaytarılacaq və biz bu qələbəni qeyd edəcəyik. Siz əsgərlər sərhədlərimizi mətinliklə qoruyursunuz, heç bir çətinlikdən qorxmursunuz. Buna görə sağ olun!

Hərbi hissənin rəhbərliyi filialın müəllim və tələbələrinə öz dərin minnətdarlığını bildirmiş və qeyd etmişdir ki, belə görüşlər əsgərlərin döyüş əzmini daha da artırır, onları səfərbər edir.

Hamlet QASIMOV,

“Xalq qəzeti”nin

bölgə müxbiri