Tacikistanın xarici işlər naziri Sirociddin Aslovun başçılıq etdiyi nümayəndə heyəti Azərbaycana işgüzar səfərə gəlmişdir.

AzərTAc xəbər verir ki, aprelin 3-də qonaqlar Fəxri Xiyabana gələrək xalqımızın ümummilli lideri, müasir Azərbaycan dövlətinin memarı və qurucusu Heydər Əliyevin xatirəsini ehtiramla anmış, məzarı önünə əklil qoymuşlar.

Görkəmli oftalmoloq alim, akademik Zərifə Əliyevanın da xatirəsi anılmış, məzarı üzərinə tər güllər düzülmüşdür.

Sonra qonaqlar Şəhidlər Xiyabanında Azərbaycanın müstəqilliyi və ərazi bütövlüyü uğrunda canlarından keçmiş qəhrəman Vətən övladlarının xatirəsini anmış, “Əbədi məşəl” abidəsinin önünə əklil qoymuşlar.

Qonaqlar Bakının ən uca nöqtəsindən Azərbaycan paytaxtının mənzərəsini seyr etmişlər. Onlara Şəhidlər Xiyabanının tarixi,  ölkəmizdə həyata keçirilən tikinti və abadlaşdırma işləri barədə məlumat verilmişdir.