Cənubi Afrika Respublikasına (CAR) səfəri çərçivəsində Azərbaycan Respublikasının xarici işlər naziri Elmar Məmmədyarov CAR-ın enerji naziri Dikobe Ben Martins ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, görüşdə Azərbaycan ilə CAR arasında enerji sahəsində əlaqələrin inkişaf etdirilməsi məsələləri ətrafında fikir mübadiləsi aparılmışdır.

Azərbaycanın enerji sahəsində təcrübəsini bölüşməyə hazır olduğunu deyən Elmar Məmmədyarov Respublikamızın Beynəlxalq İnkişaf Agentliyinin ayırdığı qrantlar vasitəsilə CAR-ın üç enerji mütəxəssisinin ölkəmizdə müxtəlif ixtisasartırma kurslarında iştirak etdiyini və gələcəkdə bu istiqamətdə əməkdaşlığın genişləndirilə biləcəyini vurğulamışdır. 

Dikobe Ben Martins CAR-ın Enerji Nazirliyinin nümayəndələrinin 2012-2013-cü illərdə Azərbaycanda olduqlarını və bir sıra məhsuldar görüşlər keçirdiklərini bildirərək, ölkələrimiz arasında enerji sahəsində əməkdaşlığın inkişafı üçün əlverişli imkanların olduğunu bildirmişdir.

AzərTAc