Beynəlxalq Qızıl Xaç Komitəsinin (BQXK) Azərbaycandakı nümayəndəliyinin rəhbəri son günlər cəbhə xəttində vəziyyətin gərginləşməsinə, atışmalara münasibət bildirmişdir.

APA -nın verdiyi məlumata görə, nümayəndəliyin rəhbəri Deniz Duran bu gün keçirdiyi mətbuat konfransında bildirmişdir ki, son vaxtlar cəbhədə yaranmış gərginliyi yaxından izləyirlər.

O, insan tələfatının təəssüf doğurduğunu vurğulamışdır: “İcmaların nümayəndələri və hakimiyyət orqanları ilə əlaqə saxlayırıq. Vəziyyət sabitləşəndən sonra həmin ərazilərə baş çəkmək fikrindəyik. Hazırda isə atışma baş verən zonalarda bizim nümayəndələrimiz yoxdur, təhlükəsizliklə bağlı belə anlarda orada nümayəndələrimiz olmur”.