Ombudsman Elmira Süleymanovanın iştirakı ilə İnsan Hüquqları üzrə Milli Fəaliyyət Planının (MFP) icra vəziyyəti ilə əlaqədar növbəti ictimai dinləmələr Daşkəsən rayonunda keçirilmişdir.
Ombudsman aparatından AzərTAc-a bildirmişlər ki, tədbirdə rayon icra hakimiyyəti və bələdiyyələrin, məhkəmələrin, daxili işlər orqanları və prokurorluğun, seçki dairəsi, dairə seçki komissiyalarının, yerli qeyri-hökumət təşkilatların, KİV-lərin və icmaların nümayəndələri iştirak etmişlər.
Tədbir iştirakçıları əvvəlcə ümummilli liderimiz Heydər Əliyevin abidəsini ziyarət etmiş, önünə əklil və gül-çiçək dəstələri düzmüşlər.
Daşkəsən rayon İcra hakimiyyətinin başçısı Tahir Kərimov məruzəsində regionların sosial-iqtisadi inkişafı Dövlət Proqramına uyğun olaraq, respublikamızda, o cümlədən bu rayonda abadlıq-quruculuq işlərinin, sosial-iqtisadi inkişaf siyasətinin uğurla həyata keçirildiyini, əhalinin vəziyyətinin daha da yaxşılaşdığını bildirmişdir. İnsan hüquqlarının müdafiəsinin və MFP-nin əhəmiyyəti qeyd olunmuş, rayonda bu sahədə görülmüş işlər haqqında ətraflı məlumat verilmişdir.
Ombudsman E.Süleymanova ölkəmizdə, o cümlədən Daşkəsəndə uğurla icra olunan MFP-nin məqsədləri, prioritetləri və tətbiqi vəziyyəti, insan hüquqlarının müdafiəsi sahəsində həyata keçirilən islahatlar və perspektivlər, habelə rəhbərlik etdiyi təsisatın fəaliyyəti, əhalinin müxtəlif qruplarının, o cümlədən qaçqınların və məcburi köçkünlərin hüquqlarının müdafiəsi üzrə görülən işlər barədə ətraflı məlumat vermişdir.
Tədbirdə insan hüquqlarının müdafiəsi, seçki hüquqlarının, o cümlədən seçicilərin şəxsiyyət vəsiqəsi ilə təmin olunması, bələdiyyələrin işinin təkmilləşdirilməsi və digər zəruri məsələlər müzakirə edilmişdir.
AzərTAc{nl}