Binəqədi Rayon İcra Hakimiyyətinin təşkilatçılığı ilə Milli Məclisin deputatlarının, idarə və təşkilat rəhbərlərinin, təhsil, səhiyyə və mədəniyyət müəssisələrinin və ictimaiyyət nümayəndələrinin  iştirakı ilə Dünya Azərbaycanlılarının Həmrəyliyi Günü və Yeni il münasibətilə tədbir keçirilmişdir. 

Tədbirin aparıcısı qonaqları salamlayaraq onları Həmrəylik Günü və Yeni il münasibətilə təbrik etmiş, 2013-cü il ərzində rayonda aparılan abadlıq-quruculuq, sosial-iqtisadi sahələrdə görülmüş işlər haqqında məlumat vermişdir. Prezident İlham Əliyevin yürütdüyü siyasət nəticəsində, iqtisadiyyatımızın inkişaf etdiyini, Dövlət Proqramlarının uğurla reallaşdırıldığını, ümumilikdə, 2013-cü ildə ölkə qarşısında duran bütün vəzifələrin şərəflə yerinə yetirildiyi bildirmişdir.

Sonra Binəqədi Rayon İcra Hakimiyyətinin başçısı Xaləddin İsgəndərov tədbir iştirakçılarını Dünya Azərbaycanlılarının Həmrəyliyi Günü və Yeni il münasibətilə təbrik edərək, əsası ümummilli lider Heydər Əliyev tərəfindən qoyulmuş və bu gün Prezident İlham Əliyevin uğurla davam etdirdiyi şərəfli ənənənin gündən-günə daha geniş vüsət aldığını vurğulamışdır.

Sonra rayonun sosial-iqtisadi inkişafında, ictimai həyatında fəal rol oynayan bir qrup şəxs fəxri fərmanlarla mükafatlandırılmışdır.

Tədbir incəsənət ustalarının çıxışları ilə davam etdirildi.

Binəqədi rayonunda Dünya Azərbaycanlılarının Həmrəyliyi Günü və Yeni il münasibətilə silsilə tədbirlər davam etdirilir. Ümumilikdə 700-ə yaxın ailəyə Yeni il sovqatı verilmişdir.

V. BAYRAMOV,

 “Xalq qəzeti”