“Azəryolservis” ASC-nin mətbuat xidmətinin rəhbəri Pünhan Mürsəliyev Trend-ə bildirib ki, Bakı-Quba yolunun 7-10-cu kilometr sahəsində tıxacların aradan qaldırılması üçün əlavə tədbirlər görülür.

Artıq Bakı-Quba yolunun 9-cu kilometrində, Bakı Beynəlxalq Avtovağzalının yaxınlığında dəmiryol üzərində mövcud yol ötürücüsünün yanında inşa edilən 4 aşırımlı yolötürücüsünün tikintisi başa çatdırılıb. Hazırda istinad divarları və yanaşma yolları inşa olunur.

P.Mürsəliyev bildirib ki, inşa olunan yanaşma yolları yol ötürücüsündən Beynəlxalq Avtovağzala, oradan isə Beynəlxalq Atıcılıq Federasiyasının bazasına qədər davam edəcək.

Eyni zamanda, Bakıdan  Sumqayıta gedən istiqamətdə - Biləcəri hissəsində yeni ötürücü inşa olunur. Yol ötürücüsünün yanaşma yolları yeni inşa olunan piyada keçidinə qədər davam edəcək. Onun yan hissəsində dairəvi hərəkət nəzərdə tutulur ki, bu da avtomobillərin istənilən istiqamətə hərəkətini təmin edəcək. Bununla da avtomobillərin normal hərəkəti təmin olunacaq.