Azərbaycan Respublikasının Dövlət Statistika Komitəsindən aldığımız məlumatda bildirilir ki, cari ilin yanvar-oktyabr aylarında Azərbaycan Respublikasının rezidentləri dünyanın 147 ölkəsinin hüquqi və fiziki şəxsləri ilə ticarət əməliyyatları həyata keçirmiş, 101 ölkəyə əmtəə ixrac olunmuş, 138 ölkədən idxal olunmuşdur. Xarici ticarət dövriyyəsi iştirakçılarının 29-u Amerika, 49-u Avropa, 38-i Asiya ölkələridir.

On ay ərzində xarici ticarət dövriyyəsi 36,2 milyard ABŞ dolları təşkil etmiş və 2012-ci ilin eyni dövrü ilə müqayisədə 4,3 faiz artmışdır. Dövriyyənin 27,3 milyard dolları ixracın, 8,9 milyard dolları idxalın payına düşmüş, nəticədə 18,4 milyard dollar həcmində müsbət saldo yaranmışdır.

Ticarət əlaqələrinin 11,6 faizi MDB dövlətlərinin, 43,1 faizi Avropa İttifaqı ölkələrinin, qalan 45,3 faizi isə digər dövlətlərin payına düşür.

İxrac məhsulları arasında xam neft, neft məhsulları, təbii qaz, meyvə-tərəvəz, bitki və heyvan mənşəli yağlar, idxal məhsulları arasında qida məhsulları, qara metal və onlardan hazırlanan məmulatlar, maşın, mexanizm, elektrik aparatları, avadanlıqlar, nəqliyyat vasitələri və onların hissələri üstünlük təşkil etmişdir. Qeyri-neft məhsullarının ixracı ötən ilin yanvar-oktyabr ayları ilə müqayisədə 9,5 faiz artaraq 1,4 milyard dollar təşkil etmişdir.

Samirə ƏLİYEVA,

“Xalq qəzeti”