Qadın voleybol komandaları arasında Çempionlar Liqası turnirinin qrup mərhələsində üçüncü turun oyunları keçirilmişdir. Azərbaycan çempionu Bakının “Rabitə” klubu bu turda Almaniyada yerli “Drezdner”in qonağı olmuş və elə bir çətinlik çəkmədən 3:0 hesabı ilə qələbə qazanmışdır.

Voleybolçularımız ardıcıl üçüncü uğurlu oyun sayəsində xal ehtiyatlarını 8-ə çatdıraraq qrupun turnir cədvəlində öz lider mövqelərini bir qədər də möhkəmləndirmişlər.  Xatırladaq ki, “Rabitə” ilə “Drezdner”in çıxış etdikləri qrupa həmçinin “ Omiçka” (Rusiya) və “Bezye” (Fransa) komandaları daxildirlər.

Elə həmin gün bu turnirdəki digər təmsilçimiz “İqtisadçı” isə öz meydanında İtaliyanın “Pyaçentsa” klubunu qəbul etmiş və təəssüf ki, məğlubiyyətə uğramışdır-1:3. Üç turdan sonra “İqtisadçı”nın 5 xalı vardır,  “Pyaçentsa” 6 xal toplamışdır. Qrupda bakılıların digər rəqibləri “Dinamo” (Rusiya) və “ Srvena Zvezda” (Serbiya) komandalarıdır. Qarşıda ikinci dövrənin oyunları durur.

Oqtay BAYRAMOV,

“Xalq qəzeti”