Qaçqın və Məcburi Köçkünlərin İşləri üzrə Dövlət Komitəsi bu günə qədər qaçqın və məcburi köçkünlər üçün salınan qəsəbələrin, bu qəsəbələrdə yaşayan ailələrin sayını açıqlamışdır.

Dövlət Komitəsinin mətbuat xidmətindən APA-ya verilən məlumata görə, 2001-2013-cü illər ərzində Dövlət Neft Fondu və digər mənbələrdən ayrılmış vəsait hesabına 2,5 milyon kvadratmetr sahəsi olan, bütün sosial-texniki infrastruktura malik 82 müasir qəsəbə salınmışdır.

Bu qəsəbələrə 40 min ailə və ya 180 min nəfərədək qaçqın və  məcburi köçkün köçürülmüşdür. Yeni salınmış yaşayış məntəqələrində 139 məktəb, 6 musiqi məktəbi, 51 uşaq bağçası, 55 tibb məntəqəsi, 45 mədəniyyət mərkəzi, 2 olimpiya idman kompleksi tikilmişdir. Qəsəbələrə 648 km yol, 815 km su, 1412 km elektrik, 333 km qaz xətti çəkilmiş, 715 ədəd müxtəlif gücə malik elektrik transformatoru quraşdırılmışdır.