Azərbaycanın Almaniyadakı səfirliyi bəzi kütləvi informasiya vasitələrinin internet səhifələrində Heilbronn şəhərində (Baden-Vürtemberq əyaləti) satışda olan Ermənistan istehsalı olan konyakların etiketlərinin üzərində Dağlıq Qarabağın Ermənistanın tərkibində göstərildiyinə dair məlumatla əlaqədar müvafiq araşdırmalar aparmışdır.
Azərbaycanın Ştuttqart şəhərindəki fəxri konsulluğu vasitəsilə bu konyakların Almaniyada satışını həyata keçirən "Aniland GmbH" şirkəti ilə əlaqə saxlanılmış və müvafiq məktub göndərilmişdir.
Azərbaycan Xarici İşlər Nazirliyinin mətbuat xidmətindən bildirmişlər ki, məsələ ilə bağlı şirkətdən daxil olmuş cavab məktubunda qeyd olunmuşdur ki, "Aniland GmbH" özünü heç bir halda Cənubi Qafqazda baş verən siyasi proseslərə qatmaq istəmir. Bu səbəbdən 2010-cu ilin yanvarından şirkət tədarükçüsündən həmin konyakların etiketlərinin dəyişdirilməsini tələb etmişdir. Bundan əlavə, məktubda bu konyakların 2010-cu ilin yanvarından satılmadığı, səhv etiketlənmiş konyakların Ermənistana geri göndərildiyi və gələcəkdə şirkət tərəfindən ancaq müvafiq etiketli konyakların satışının həyata keçiriləcəyi bildirilmişdir.{nl}