Türkiyənin rəsmi Anadolu xəbər agentliyi Azərbaycan Dövlət Teleqraf Agentliyinin (AzərTAc) baş direktoru Aslan Aslanovun milli mətbuatımızın 135-ci ildönümü ilə bağlı müsahibəsini yaymışdır.
AzərTAc-ın baş direktoru müsahibəsində bildirmişdir ki, Azərbaycan mətbuatı azad medianın məhsuludur. Sovet dövründə ölkəmizdə 10 böyük qəzet və eyni sayda jurnal nəşr olunurdusa, indi cəmiyyətin bütün təbəqələrinin səsini çatdıran 30-dan çox gündəlik, 100-ə qədər həftəlik qəzet vardır.
Bundan başqa, 8 ölkə miqyaslı və 14 yerli televiziya kanalı fəaliyyət göstərir. Əhalinin 40 faizindən çoxu internet istifadəçisidir. Bütün bunlar müasir Azərbaycan cəmiyyətində fikir və söz azadlığının əsas göstəricisidir.
Müsahibədə o da vurğulanır ki, yubiley münasibətilə Azərbaycan Prezidenti İlham Əliyevin sərəncamları ilə ölkəmizdəki KİV-lərə maddi yardım göstərilmişdir. Dövlətimizin başçısı jurnalistlər üçün mənzillərin tikilməsi məqsədi ilə öz fondundan maliyyə vəsaiti də ayırmışdır. Bu, Azərbaycan dövlətinin müstəqil və güclü mətbuatın möhkəmlənməsinə verdiyi əhəmiyyətin bariz nümunəsidir.

Oqtay BAYRAMOV AzərTAc-ın xüsusi müxbiri
Ankara