... Həmsöhbətimin stolunun üstündə Avropanın müxtəlif ölkələrində nəşr olunmuş  bir neçə nəfis jurnal var  idi.  Tərtibatdan da bilinirdi ki, əksəriyyəti turizm mövzusundadır. Heç birinin adı mənə tanış gəlməyən həmin mətbuat vasitələrini kimin oxuduğunu öyrənmək istədim. Cavab ürəkaçan idi : Bu jurnalları əlinə götürən  istənilən adam oxumaqdan əvvəl  üz qabığındakı şəkilləri görür.

Həmin şəkillərdə isə Qəbələnin turizm obyektləri və  təbiəti əks olunub. Baxın, peşəkarlıqla çəkilmiş şəkillərin hər birində bu qədim diyarın bir mənzərəsi göz oxşayır. Əcnəbilər bizim təbiətimizi də, tarixi abidələrimizi də, ənənələrimizi də, insanlarımızın qonaqpərvərliyini də sevirlər. Qəbələyə gələn istənilən qonaq buradan ayrılanda sağollaşmaq əvəzinə, “görüşənədək” - deyib gedir. Halbuki, əvvəllər belə hadisələrlə çox təsadüfi hallarda rastlaşardıq. İndi Qəbələ təkcə Azərbaycanın və azərbaycanlıların şəhəri deyil, dünyanın və bütün xalqların şəhəri kimi tanınır. Beynəlxalq festivallar zamanı burada, az qala, bütün xalqların təmsilçilərini görmək mümkündür.  Dünya miqyaslı tədbirlərin burada keçirilməsi isə artıq şəhərimizin ənənəsinə çevrilib.

Rayon icra hakimiyyəti başçısının müavini Abil Ağasəfov bu fikirləri söyləməklə yanaşı, əlavə etdi ki, Qəbələnin bu şəkildə inkişaf etdirilməsinin təşəbbüskarı ulu öndər Heydər Əliyev idi. Heydər Əliyev Azərbaycanın ağır illərində hər dəfə bizim rayona gələndə deyirdi ki, biz Qəbələni Qafqazın və dünyanın ən gözəl şəhərlərindən birinə çevirəcəyik. O, Qəbələnin möhtəşəm bir inkişaf mərhələsi yaşayacağına inanırdı və həmin inamı Prezident İlham Əliyev günün reallığına çevirdi. İlham Əliyev Qəbələnin bu inkişafını təmin etdi. Heydər Əliyev Fondunun prezidenti, Milli Məclisin deputatı Mehriban xanım Əliyeva isə bizim şəhəri dünya mədəniyyətinin əsas mərkəzlərindən birinə çevirdi. Beynəlxalq aeroport, dünya standartları səviyyəsində olan avtomobil yolları, ən ali səviyyəli turizm obyektləri, ən mötəbər beynəlxalq tədbirlərin keçirilməsinə imkan verən möhtəşəm saraylar, idman kompleksləri, xüsusən, avropalıların daha çox maraqlandığı “Tufan” dağ-xizək yay- qış istirahət kompleksi,  mədəniyyət mərkəzləri, ən müasir  səhiyyə-sağlamlıq ocaqları və bir çox amillər Qəbələnin əsl Avropa şəhəri, əsl dünya mədəniyyət mərkəzlərindən biri kimi nüfuz qazanmasını təmin etmişdir.  Bu şəhər öz tarixi şöhrətini sürətlə bərpa etməkdədir. Şəhərimizi indiki səviyyəyə qaldıranlar isə Qəbələyə deyil, Azərbaycan tarixinə xidmət edirlər.

Rayon icra hakimiyyətinin başçısı Səbuhi Abdullayev əsl Heydər Əliyev siyasi kursunun yetirməsidir. Onun nə zamansa həyata keçirilən tədbirlər, reallaşdırılan  layihələr barədə  danışdığını görən olmayıb. Arqumenti də belədir ki, biz dövlətin və cənab dövlət başçımızın üzərimizə qoyduğu vəzifələri, tapşırıq və tövsiyələri yerinə yetiririk.  Görülmüş işlər barədə isə rüblük, yarımillik və ya illik hesabatlarla  şura iclaslarında çıxış edirik. Ona görə də gördüyümüz işlər haqqında danışmağı o qədər də  məqsədəuyğun saymıram.

Səbuhi müəllim rayon rəhbərliyinin həyata keçirdiyi tədbirlər və görülən işlər barədə danışmasa da, dövlət başçımızın Qəbələnin inkişafına ayırdığı diqqət və qayğı barədə əhatəli söz açdı: - Rayonumuzun ictimai həyatında baş verən əsas əlamətdar hadisələr  Azərbaycan Respublikasının Prezidenti cənab İlham Əliyevin 2013-cü ilin fevral ayının 28-də və avqust ayının 14-də Qəbələyə səfərləri olmuşdur. Səfər zamanı ölkə başçısı bir çox mühüm sosial və iqtisadi xarakterli obyektlərin açılışında iştirak etmiş, inşaat işləri davam edən tikintilərdə işin gedişi ilə tanış olmuşdur. Görülmüş işlər barədə fikirlərini bildirən ölkə başçısı qarşımıza yeni-yeni vəzifələr qoymuşdur.

 İcra hakimiyyətinin başçısı  qeyd etdi ki,  bu ilin doqquz ayında rayonumuzun ictimai həyatında baş verən bütün əlamətdar hadisələr hər bir qəbələlidə qürur hissi yaradır. Hesabat dövründə Qəbələ 4 ölkənin prezidentlərinin iştirakı ilə Türkdilli Dövlətlərin Əməkdaşlıq Şurasının III zirvə toplantısına, Qəbələ V Beynəlxalq Musiqi Festivalına, “MDB-nin mədəniyyət paytaxtları - 2013” dövlətlərarası proqramının təntənəli açılşına, “Qəbələ mürəbbə festivalı”na, “İbtidai təhsil-yeni baxışlar, təcrübələr və perspektivlər” mövzusunda konfransa, “Gənc xilasedici və yanğınsöndürən” adlı respublika və beynəlxalq birinciliyinə ev sahibliyi etmişdir. II Qəbələ Kuboku futbol oyunları və digər idman tədbirlərinin keçirilməsi də məhz hesabat dövründə baş vermişdir. Eləcə də Qəbələ rayonu ilə Ukrayna Respublikasının Rovno vilayəti arasında regionlararası əməkdaşlıq haqqında anlaşma protokolu imzalanmışdır.

İndi haqqında söz açmaq istədiyimiz faktlar barədə rayon rəhbəri danışmaq istəməsə də biz bir çox məqamları öyrəndik. Məsələn, öyrəndik ki,  cari ilin ötən dövrü ərzində iqtisadiyyatın ayrı-ayrı sahələri üzrə rayonda 212.735 min manatlıq məhsul istehsal edilib ki, bu da keçən ilin müvafiq dövrünə nisbətən 5.193 min manat, yaxud 2,5 faiz çoxdur. Ümumi məhsul buraxılışı sənayedə 1 milyon 966 min manat, yaxud 17,6 faiz, kənd təsərrüfatında  1 milyon 767 min manat, yaxud 3,9 faiz,  tikintidə 273 min  manat, yaxud 0,2 faiz, nəqliyyatda 57 min manat, yaxud 2,4 faiz, rabitədə 30 min manat, yaxud 5,1 faiz, ticarətdə 1.100 min manat, yaxud 5,1 faiz artıb. Bu dövrdə adambaşına düşən ümumi məhsul buraxılışı 2.139 manat təşkil edib ki, bu da keçən ilin müvafiq dövrünə  nisbətən 0,8 faiz çoxdur. Dövlət siyasətinin əsas istiqamətlərinə əməl olunması nəticəsində rayon iqtisadiyyatında  qeyri-dövlət bölməsinin xüsusi çəkisi  71,4 faiz təşkil edib. İlin 9 ayı ərzində  524 daimi iş yeri açılıb.

    Əhalinin elektrik enerjisi, təbii qaz, poçt, rabitə və digər kommunal xidmətləri ilə təminatının daha da yaxşılaşdırılması məqsədilə bu sahələr daim diqqət mərkəzində saxlanılıb. Azərbaycan hökuməti və Dünya Bankının maliyyə dəstəyi  əsasında Qəbələ şəhərinin su təchizatı və kanalizasiya sisteminin yenidən qurulması istiqamətində 1-ci mərhələ üzrə işlər davam etdirilib, 2-ci mərhələ üzrə isə  tikinti işlərinə  başlanılıb. Qəbələ Telekommunikasiya Qovşağı 9 ay ərzində  proqnoz tapşırığına 104,9 faiz əməl etməklə ötən ilin müvafiq dövrü ilə müqayisədə 9,1 faiz, yəni 78,5 min manat artıq gəlir əldə edib. Rayonun yaşayış məntəqələrinin sel sularından qorunması, kənd təsərrüfatının suvarma suyu ilə təminatı üçün suvarma kanalları 375 min kubmetr lildən,  daşqın və selə qarşı mübarizə məqsədilə isə 828 min kubmetr çay məcrası daş və qumdan təmizlənib, 258 kubmetr qabion bəndi vurulub, 4.151  kubmetr daş beton bəndi cari təmir edilib.

İlin geridə qalan ayları genişmiqyaslı tikinti-quruculuq içləri ilə yadda qalıb. Məsələn, “Qəbələ Mədəniyyət  Mərkəzi”, Qaradeyn kəndində inşa edilən şərab zavodu, Böyük Əmili kəndində inşa edilən 1200 başlıq heyvandarlıq kompleksi, Vəndam qəsəbəsində 1200 başlıq heyvandarlıq kompleksi,  1200 yerlik Heydər Əliyev “Konqres Holl”, “Karvansaray” oteli, Zaragan kəndində 2 ədəd  5 mərtəbəli, 155 mənzilli yaşayış binaları ,  22 kilometr uzunluğunda Qəbələ-Ağdaş   avtomobil    yolunun      yenidən  qurulması, Qəbələ-Oğuz  avtomobil   yolunun   əsaslı   təmiri,   Kiçik- Pirəlli kəndində 180 şagird yerlik tam orta məktəb binası obyektlərində tikinti, quraşdırma və təmir işləri başa çatıb, rayonun Nohurqışlaq kəndinə qaz çəkilişi tamamlanıb və qeyd edilən obyektlər  istismara qəbul edilərək fəaliyyətə başlayıb.

Təbii ki, istənilən rayon və ya şəhər barədə qəzet materialı hazırlayarkən ilk növbədə söz açılmalı sahələrdən biri də təhsil sektorudur.  Ötən dövr Qəbələnin  təhsil həyatında da uğurlu olub. 2012-2013-cü  dərs  ilində   müvəffəqiyyət  faizi  99,8 faiz,  keyfiyyət  göstəricisi  isə  59,9 faiz  olub. İmtahana  buraxılmış  1375  şagirddən 1374  nəfəri  müvəffəq  qiymətlərlə  tam orta təhsilə dair attestat  almağa müvəffəq olub. Rayon məktəblərinin  5 məzunu  qızıl  medala, 2  məzunu isə   fərqlənmə  attestatına layiq görülüb. Ali məktəblərə qəbul olmaq üçün sənəd verən  795 nəfər məzundan   496 nəfəri tələbə adını qazanıb.  Bu  da  əvvəlki illə  müqayisədə  46  nəfər  çoxdur.  Qəbul  olunanların 104  nəfəri  500-dən, 27 nəfəri  isə  600-dən   yuxarı bal toplayıb.

Təbii iqlim şəraiti, mineral  bulaqları, gur  şəlalələri, iti  axan   dağ  çayları, tarixi  keçmişi, “ İpək yolu”nun  üstündə  yerləşməsi  Qəbələnin  turizm məkanı  kimi  inkişaf  etməsinə  stimul  verən  amillərdəndir. Bu gün  Qəbələdə fəaliyyət göstərən 16 otelin 4-ü  beşulduzlu, biri dördulduzlu və  ikisi  üçulduzludur. Həmin otellərin hesabına Qəbələdə bir gündə 1500-dən artıq  turisti qəbul etmək imkanı yaranıb.  Bütün turizm obyektlərində  olan şərait,   xidmətin səviyyəsi gələn qonaqları razı salır. Bunun nəticəsidir ki, 2013-cü ilin 9 ayı ərzində  Qəbələyə 35 min 640 nəfər  turist gəlib. Ölkə rəhbərinin qayğısı, rayon rəhbərliyinin səyləri əsasında  görülən işlər, həyata keçirilən və keçiriləcək  layihələr deməyə imkan verir ki, Qəbələ çox yaxın zamanda Beynəlxalq Turizm Mərkəzi kimi dünyada tanınan bölgələrdən  birinə  çevriləcək. Bu bir faktdır ki,  turizmin Qəbələ rayonunda sürətli inkişafı ixtisaslı kadrlara olan tələbatı da artırıb. Bu məqsədlə 2009- cu ildən fəaliyyət göstərən Qəbələ Turizm və Otelçilik üzrə Peşə Tədris Mərkəzində kompyuter operatoru, əməliyyatçı mühasib, mehmanxana inzibatçısı, mehmanxana qeydiyyatçısı, ofisiant, barmen-bufetçi, aşpaz ixtisasları üzrə qruplar fəaliyyət göstərir. Hazırda tədris mərkəzində 6 ixtisas üzrə  194 nəfər şagird dövlət hesabına təhsil alır. Bunlardan 94 nəfəri ümumi orta təhsil bazasından, 100 nəfəri isə tam orta təhsil bazasından olan şagirdlərdir.  Əhali  arasında  meyvəçiliyin  və üzümçülüyün inkişaf  etdirilməsi  istiqamətində  təbliğat  işləri genişləndirilir. Mövcud bağ sahələri 5603 hektar, üzüm plantasiyaları isə     460 hektardır. Keçən dövr ərzində bağlarda və plantasiyalarda aqrotexniki işlər davam etdirilib, əhalinin əsas hissəsinin məşğulluğu təmin olunub.

 ... Mən Səbuhi Abdullayevin  rayonun müxtəlif kəndlərində sakinlərlə görüşlərində  dəfələrlə iştirak etmişəm. Həmin görüşlərin heç birində kimsə öz şəxsi problemi barədə danışmırdı. Qaldırılan məsələlər əsasən yaşayış məntəqələrinə qaz xəttinin çəkilməsi, elektrik dirəklərinin dəyişdirilməsi, yolların asfaltlaşdırılması, yeni məktəb binalarının, səhiyyə, mədəni-maarif obyektlərinin, körpülərin tikintisi, artezian quyularının qazılması və dağ çaylarında sahilbərkitmə işlərinin aparılması ilə bağlı olurdu.  Bu isə o deməkdir ki, Qəbələdə hamı ümumi inkişafın sürətləndirilməsi üçün nə isə etmək istəyir.

 Təbii ki,  2013-cü ilin ən böyük hadisəsi  oktyabrın 9-da keçirilən prezident seçkiləri idi. Hamıya məlumdur ki,  Azərbaycanda keçirilən prezident seçkiləri bir çox ölkələr üçün örnək oldu. Seçkilərin Qəbələ rayonunda da demokratik, ədalətli və şəffaf keçirilməsi  isə mənim gözlərimin qabağında baş verdi. Bu barədə əhatəli söz açdığıma görə indi ancaq onu qeyd edirəm ki, qəbələlilər mövcud siyasi kursu dəstəkləmək üçün sözün həqiqi mənasında mükəmməl bir yekdillik, mütəşəkkillik nümayiş etdirdilər.

... Dəmiraparançayın üstündən keçib üzü  Vəndam tərəfə gedəndə  adamı heyrət götürür. Bu təbiət nə qədər qüdrətli, nə qədər zəngin imiş, İlahi! Cəmi iki ay əvvəl zümrüd kimi yamyaşıl olan meşələrdə indi palitranın bütün rəngləri görünür. Yamac boyu düzülmüş, hər birinin xəzanı ayrı bir rəngdə olan ağaclar, sanki, payızın rənglər simfoniyasını ifa edirlər. Elə bil, bu diyarın təbiəti də beynəlxalq festivallar şəhərinin payız akkordlarını zümzümə etmək  istəyir.  Ağaclar daha həzin, daha lirik və dağlara xas şaqraq bir ahənglə insanların uğurlarını  yarpaqların rəngi qədər zənginləşdirə bilirlər. Bu dağların payızı necə əsrarəngiz, necə nağılvari olurmuş...

İlqar HƏSƏNOV,

 “Xalq qəzeti”nin  bölgə müxbiri