Binəqədi Rayon İcra Hakimiyyəti və Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun birgə təşkilatçılığı ilə keçirilən “Yerli icra hakimiyyəti orqanları ilə kütləvi informasiya vasitələri arasında əməkdaşlığın inkişaf etdirilməsi” mövzusunda konfransda media orqanlarının baş redaktorları və təmsilçiləri, Binəqədi rayon ictimaiyyətinin nümayəndələri iştirak etmişlər.

Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli bildirmişdir ki, RİH-lərlə keçirilən birgə tədbirlər artıq ənənəvi xarakter almışdır. Bu da nəticə etibarilə media və icra strukturları arasında qarşılıqlı əməkdaşlığı dinamik şəkildə genişləndirir.

Azərbaycan Mətbuat Şurasının sədri Əflatun Amaşov yerli icra hakimiyyəti orqanları ilə media arasında qarşılıqlı əməkdaşlığın inkişaf etdirilməsinin vacibliyini vurğulamış, bu yöndə Kütləvi İnformasiya Vasitələrinin İnkişafına Dövlət Dəstəyi Fondunun səmərəli fəaliyyətindən geniş bəhs etmişdir. O bildirmişdir ki, fond təkcə dövlət büdcəsindən ayrılan maliyyə vəsaiti hesabına yox, digər icra strukturlarının dəstəyi ilə də layihələr həyata keçirir.

Binəqədi RİH-in başçısı Xaləddin İsgəndərov rayonda görülən geniş abadlıq-quruculuq işlərindən danışaraq bildirmişdir ki, rayon rəhbərliyi bu tədbirlərin, eləcə də problemlərin işıqlandırılması istiqamətində media ilə qarşılıqlı əməkdaşlığa ciddi əhəmiyyət verir.

Media və icra strukturları arasında şəffaf əməkdaşlığı korlayan mətbu orqanlara, reket jurnalistikasına toxunan Vüqar Səfərli bildirmişdir ki, belə nəşrlər medianın gördüyü işlərə də kölgə salır. Onların yazdıqlarının heç bir təsir dairəsi yoxdur. Məqsədimiz odur ki, Azərbaycanda fəaliyyət göstərən mətbu orqanlar jurnalistikanın adına xələl gətirən işlərlə deyil, peşəkar fəaliyyətlə məşğul olsunlar.

 Konfrans diskussiyalarla davam etdirilmiş, bir sıra maraqlı mülahizə və təkliflər səslənmişdir.

T.AYDINOĞLU,

“Xalq qəzeti”