Qafqaz Müsəlmanları İdarəsinin (QMİ) Qazılar Şurası Məhərrəm ayının başlanması və Aşura mərasimi ilə əlaqədar fətva vermişdir.

Bu münasibətlə keçirilən mərasimdə QMİ-nin sədri şeyxülislam Allahşükür Paşazadə dua oxunduqdan sonra Aşura gününün əhəmiyyətini xatırlatmışdır. Qeyd etmişdir ki, din xadimlərinə və yerlərdə ibadətxanaların başçılarına Allahın kəlamını çatdırmaq kimi məsuliyyətli və şərəfli bir vəzifə tapşırılmışdır. Həmin vəzifəyə ciddi yanaşmaq, diqqətli olmaq və dövlətin maraqlarını qorumaq lazımdır. Qeyri-mütəşəkkil yürüşlər təşkil etmək, özünə əziyyət vermək və qan çıxarmaq yolverilməzdir.

Bildirilmişdir ki, artıq uzun illərdir Qafqaz Müsəlmanları İdarəsi Aşura günündə qanvermə aksiyası təşkil edir. Şeyxülislam bir çox xəstələrin həyatını xilas etməyə imkan verən bu nəcib ənənəni davam etdirməyə çağırmışdır.

Sonra QMİ Qazılar Şurasının fətvası oxunmuşdur. Fətvada deyilir ki, Hicri təqvimi ilə yeni 1435-ci ilin başlanğıcı - Məhərrəm ayının 1-i miladi təqvimi ilə 2013-cü il noyabrın 5-nə, Aşura günü isə noyabrın 14-nə təsadüf edir.

Fətvada Kərbəla şəhidlərinin xatirəsinin anıldığı matəm günləri ilə əlaqədar bütün dindarlara dərin hüznlə başsağlığı verilir, matəm mərasimlərini imam Hüseynin adına layiq şəkildə keçirmək tövsiyə olunur.

Aşura mərasimləri ictimai asayişə riayət edərək məscidlərdə, ibadət ocaqlarında keçirilməlidir. Özünə əziyyət vermək və islamın qəbul etmədiyi digər əməllərə yol vermək olmaz.

AzərTAc