Beynəlxalq Avrasiya Mətbuat Fondunun (BAMF) sədri, qlobal media şəbəkəsi olan Beynəlxalq Mətbuat İnstitutunun (BMİ) İdarə Heyətinin üzvü və Azərbaycan Milli Komitəsinin rəhbəri Umud Rəhimoğlu Avstriyanın paytaxtı Vyanada BMİ-nin İdarə Heyətinin iclasında iştirak etmişdir.

BAMF-ın informasiya departamentindən bildirmişlər ki, BMİ-nin İdarə Heyətinin builki iclası səmərəli əməkdaşlıq çərçivəsində keçmişdir.

İdarə Heyətinin toplantısında mətbuat azadlığı sahəsində əldə olunmuş nailiyyətlər, quruma üzvlüklə bağlı strateji sənəd, Beynəlxalq Mətbuat İnstitutunun 2014-cü il üçün media azadlığı strategiyası və prioritetləri, BMİ-nin gələn il keçiriləcək Dünya Konqresi, innovativ xəbər platforması və digər məsələlər müzakirə edilmişdir.

Mətbuatın vəziyyəti ilə bağlı məsələlərin müzakirəsi zamanı Azərbaycan Milli Komitəsinin fəaliyyəti xüsusi qeyd edilmişdir.  Xüsusən postsovet məkanında azad sözün və fikrin təşviq edilməsi üçün media qurumlarının Beynəlxalq Mətbuat İnstitutunun işinə cəlb olunması təqdir edilmişdir.

BMİ-nin milli komitələrinin təşəbbüsü ilə əsası qoyulan Bakı Regional Mərkəzinin səyləri nəticəsində Gürcüstanda, Qazaxıstanda, Qırğızıstanda yaradılan milli komitələrin mətbuat azadlığının qorunması, jurnalist təşəbbüslərinin dəstəklənməsi, təcrübə imkanlarının genişləndirilməsi baxımından əhəmiyyəti qeyd olunmuşdur.

İclasda çıxış edən U.Rəhimoğlu Azərbaycanda söz və mətbuat azadlığının inkişafı istiqamətində görülən işlərdən danışmışdır. O, BMİ-nin strukturlaşması və fəaliyyətinin gücləndirilməsi üçün səylərin bir araya gətirilməsi istiqamətində çıxış edərək azad medianın qorunması, müasir jurnalistikada kibercinayətin qarşısının alınması, qurumun jurnalist təhlükəsizliyinin qorunması ilə bağlı 2014-cü ildə Keyptaunda keçiriləcək Dünya Konqresinin əhəmiyyətini vurğulamışdır.

AzərTAc