Abşeron rayonu

Prezident seçkiləri ölkənin hər yerində olduğu kimi,  Abşeron rayonunda da mütəşəkkil qaydada keçirildi. Abşeronlular böyük həvəslə növbəti dəfə ölkə başçısını seçmək üçün seçki məntəqələrinə gəlir, heç bir pozuntuya yol vermədən  səsvermədə iştirak edirdilər.

45 saylı Abşeron seçki dairəsi üzrə  dairə seçki komissiyasının  sədri Dilşad Abbasovadan aldığımız məlumata görə,  2-si “N” saylı hərbi hissə olmaqla rayonda 37 məntəqə mövcuddur. 43894 seçicinin 956-sı bu seçkilərdə ilk dəfə səs verir. 290 nəfərin qeydiyyatdan çıxarıldığını deyən DSK sədri bildirdi ki,  seçkiləri 2-si xarici (Sergey Kozmenko-Niderland, Maqomed Dibirov- Dağıstan) müşahidəçi olmaqla  391 müşahidəçi izləyib. Saat 12-yə olan məlumata görə,  seçicilərin 37,5 faizi (17392 nəfər) səs verib.  O bildirdi ki,  məntəqələrə gəlib səsvermədə iştirak edə bilməyən fiziki qüsurlu şəxslərin də səsvermədə iştirakı  daşınan qutular vasitəsilə  təmin edilib. Səsvermənin gedişatını “exit-poll” vasitəsilə də izləmək mümkün olub.  Bundan  əlavə, 10 məntəqədə veb-kameralar vasitəsilə dünyanın istənilən nöqtəsindən birbaşa səsverməni müşahdə etmək mümkün olub. 102 yaşlı Abşeron sakini  Zəhra Muradova da evdə səs verərək öz vətəndaşlıq hüququndan istifadə etməklə yanaşı, həm də digərlərinə örnək olub.

Son  məlumata görə,  45 saylı DSK üzrə 36971  seçici (79,7 faiz) səs vermişdir.

Xırdalan qəsəbəsi  şəhər  statusu  alandan  sonra  Bakı  ətrafının  ən abad, yaraşıqlı  məntəqələrindən  biri  kimi  inkişaf  edir.  Təzələnən  kommunikasiyalar, yeni  tikilən  sosial  obyektlər,  ümumi  abadlıq  tədbirləri,  ardıcıl  həll edilən  problemlər şəhər sakinlərində   daha  xoş  günlərə  ümidləri  artırır. Xırdalanlılar  növbəti  prezident  seçkilərinə  xoş  əhval-ruhiyyə  və  yeni  arzuların  gerçəkləşməsi  inamı  ilə  gəlmişdilər.

Şəhərin  28-ci  məhəlləsində yerləşən  25  saylı  Abşeron  seçki  dairəsinin  15  saylı  məntəqəsinə  səhər tezdən   axın-axın  seçici  gəlirdi.   İlk  dəqiqələrdə  növbə yaransa da,  məntəqə  seçki komissiyası  üzvlərinin   səliqə-sahmanlı  işi  nəticəsində  tezliklə  səsvermə  konveyeri  ahəngdar  işləməyə  başladı.   İçəri  daxil olanlar  çağırış  vərəqini  təqdim  edən  kimi  onların  baş  barmağı  ultrabənövşəyi   şüa ilə  yoxlanıb  şəffaf  mürəkkəblə işarələnirdi.  Bunun  ardınca   qeydiyyatdan  keçənlər  bülleten  alıb,  pərdə  arxasına keçir,  sərbəst  şəkildə  seçimlərini  edir,  şəffaf  qutuya yaxınlaşırdılar.

Məntəqə  komissiyasının  sədri  Aygün  Həsənova  bu  prosesi  göstərib  ərazidəki  hər  seçicinin  səsverməyə  dəvət  aldığını,  sərbəst  seçim  üçün  lazımi  şərait yaradıldığını  söylədi.

Məntəqəyə  gələnlərin  içərisində  gənclərin  çoxluğu  diqqəti  cəlb  edirdi.  Komissiya  sədri  bildirdi ki,  bu, gənc  şəhər kimi  sürətlə  böyüyən  Xırdalan  əhalisinin  böyük  hissəsinin  yeni  nəsil  olduğu  ilə bağlıdır.  Onların da  çoxu  ilk dəfə  səs verənlərdir.

Ailəlikcə  səs verməyə  gələn  Mehdiyevlərin  yüksək  əhval-ruhiyyəsini   görməmək  mümkün deyildi.   Səbəbini  soruşanda  ailənin  ağbirçəyi  Nuriyyə  nənə  bildirdi ki,   bu onun  həyatda sayını-hesabını  itirdiyi seçkilər  içərisində  ən  əlamətdarıdır,  həmişəlik  yadda qalacaq. Bu il böyük  nəvəsi  Aydın  ali  məktəbə  daxil olub  və  ailə  ənənəsinə   qoşularaq  ilk  dəfə  səs verir.

Aydının  atası  Zeynal  müəllim  anasının  dediklərinə  əlavə  olaraq  bildirdi ki,  Xırdalanda  yaşasalar da,  oğlu  öz  arzusu  ilə  Prezident İlham Əliyevin vaxtilə  oxuduğu  Bakının  Səbail  rayonundakı  6 saylı  orta məktəbi  bitirib. Aşağı  siniflərdə təkidlə  xahiş  etdi ki,  təhsilini  bu  şöhrətli  məktəbdə  davam etdirsin.  “Oğlumla  söhbət  edən  məktəbin  direktoru  Gülşən  Orucova  bilik səviyyəsini  yoxlayandan  sonra  İlham Əliyevin  həyat  yolunu  özünə  örnək  seçən Aydının sənədlərini  istisna qaydasında  qəbul etdi.   Oğlum  bu il  yüksək balla  Bakı  Diplomatiya  Akademiyasına  qəbul olmaqla  bu  etimadı doğrultdu,   arzu-istəyində  ardıcıl  olduğunu  sübut etdi.

Aydın  isə  bunları söylədi:

– Prezident  İlham Əliyev  mənim  həyat idealımdır.  Mən  də onun  kimi  diplomat   olmağı  arzulamışam.  Xoşbəxtəm  ki, bu yolda   ilk  addımlarımı  atıram. İlham Əliyev  bu gün  nəinki  Azərbaycanın ən  güclü  siyasətçisi,  regionun  ən  ağıllı dövlət  xadimi,  həm də  dünyanın  ən  mahir  diplomatlarından  biridir.

İlk dərs  günümdə  bizi  qəbul  edən  rektor  Hafiz  Paşayev  bunu   bizə  xatırladıb,  İlham Əliyev  kimi  diplomat  olmağımızı  arzuladı. Bu gün mən  öz  qəhrəmanıma,  idealıma səs verməklə  çox  xoşbəxtəm. Ailəmiz  bu  sevinci  əlamətdar etmək üçün hamılıqla  səs verməyə  gəlib. İnanırıq ki,  İlham Əliyev  xalqın  çoxluğunun səsini  qazanıb  Azərbaycanı  dünyanın  inkişaf  etmiş  ölkələri  sırasına  çıxaracaq" - deyə bildirdi.

Kürdəmir rayonu

Kürdəmirdə də səsvermə gündəlik həyat ritmini pozmadan, daha dəqiq desək, yüksək bayram əhval-ruhiyyəsində keçirildi.      57 saylı Kürdəmir rayonu üzrə dairə seçki komissiyasından verilən məlumata əsasən, 41 məntəqədə 41544 seçici qeydiyyatdadır. Seçicilər axın-axın gələrək növbəti beş il üçün öz gələcəklərinə səs veriblər.

58 saylı Hacıqabul-Kürdəmir dairə seçki komissiyasının 6 məntəqə seçki komissiyasında  4602 seçici qeydiyyatdan keçib.

65 saylı Saatlı-Sabirabad-Kürdəmir dairə seçki komissiyası 25 məntəqə seçki komissiyasından  ibarətdir.  Məntəqənin 15083 nəfər seçicisi vardır.

Ümumiyyətlə, cəmi 3 dairə seçki komissiyası üzrə 61229 seçici vardır. 57 saylı dairə seçki komissiyasının 11 məntəqəsində, 65 saylı Saatlı-Sabirabad-Kürdəmir dairə seçki komissiyasının bir məntəqəsində veb-kameralar quraşdırılmışdır.  Bununla da səsvermənin gedişini canlı olaraq izləmək mümkün olmuşdur.

Məlumat üçün qeyd edək ki, hər üç dairə seçki komissiyasında bu il ilk dəfə səs verənlərin sayı 2386 nəfər olmuşdur.  Rayonda  səsvermənin gedişini  müxtəlif məntəqələrdə ATƏT-in və MDB-nin  müşahidəçilər qrupu  izləmiş, heç bir qanun pozuntusu və xoşagəlməz hadisə baş verməmişdir.

Salyan rayonu

Salyan rayonunda 2 dairə seçki komissiyası - 59 saylı Salyan DSK və 60 saylı Salyan-Neftçala DSK yerləşir. 59 saylı Salyan DSK-da 38, 60 saylı Salyan-Neftçala DSK-da isə 33  məntəqə Salyan rayonunda yerləşməklə 37 seçki məntəqəsi vardır. Rayon uzrə ümumi seçicilərin sayı  69693-dür. Bunların 37622 nəfəri 59 saylı Salyan dairə seçki komissiyasında, 32071 nəfəri isə 60 saylı Salyan-Neftçala dairə seçki komissiyasında  qeydə alınıb.    59 saylı Salyan DSK-nın 8 məntəqəsində, 60 saylı Salyan-Neftçala DSK-nın isə 5 məntəqəsində veb -kamera quraşdırılmışdır.

Dairə seçki komissiyaları seçki gününə qədər tam təmir edilmiş, ətrafı abadlaşdırılmış və lazımi avadanlıqlarla təmin edilmişdir. Məntəqələrin fasiləsiz rabitə və işıqlandırma sisteminin dayanıqlı olması üçün lazımi tədbirlər görülmüşdür.

9 oktyabr 2013-cü il tarixdə Seçki Məcəlləsinə uyğun olaraq səhər saat 8-də rayon üzrə 71 seçki məntəqəsinin hamısı açıq elan edilmiş və heç bir nöqsan qeydə alınmamışdır.

Salyan rayonunda 2 nəfər ATƏT-in uzunmüddətli müşahidəçisi - Almaniyadan olan Karl Fredrix Fink və Norveçdən olan xanım Slyen Engunn Engesater fəaliyyət göstərirlər. Bundan başqa, bütün məntəqələrdə Yeni Azərbaycan Partiyası, bitərəflər, qeyri-hökumət təşkilatları və digər siyasi partiyalardan 800 nəfərə yaxın müşahidəçi seçkilərin gedişini izləyiblər. Bunlardan başqa, beynəlxalq təşkilatlardan qısamüddətli müşahidəçilər, eyni zamanda, 2 müxtəlif qeyri-hökumət təşkilatından 59 saylı Salyan seçki dairəsində 9, 60 saylı Salyan-Neftçala seçki dairəsində isə 5 seçki məntəqəsində “exit-poll” keçirilir.

Saat 12-yə olan məlumata görə, Salyan rayonu üzrə 71 seçki məntəqəsində, 59 saylı Salyan seçki dairəsində 7953, 60 saylı Salyan-Neftçala seçki dairəsi üzrə 7332, ümumilikdə 15285 nəfər seçkidə iştirak etmişdir ki, bu da ümumi seçicilərin 21,93  faizini təşkil etmişdir.

Heç bir məntəqədə qanun pozuntusu qeydə alınmamışdır.

Hacıqabul rayonu

58 saylı Hacıqabul-Kürdəmir dairə seçki komissiyası üzrə 46 məntəqədə 42250 seçici qeydiyyatdan keçib. 644 seçici isə qeydiyyatdan çıxıb.

DSK-nın Hacıqabul rayonu üzrə 40 məntəqəsində 37398 seçici qeydiyyatdan keçib, 625 nəfər isə qeydiyyatdan çıxıb. Bu il seçicilərin 4,2 faizi- 1592 nəfər ilk dəfə səsvermə hüququ qazanmışdır.

Rayon üzrə 8 seçki məntəqəsində veb-kameralar quraşdırılmışdır. Hacıqabullular  builki prezident seçkilərində görünməmiş fəallıqla iştirak etmişlər. Bunu təkcə bu fakt da sübuta yetirir ki, yaşı 80-100 arası olan 613 nəfər,100 yaşdan yuxarı olan 16 nəfər səsvermədə iştirak etmişdir. Onların iştirakını təmin etmək üçün daşınan qutular yaşadıqları ünvanlara aparılmışdır.  Ümumiyyətlə, səsvermə zamanı heç bir qanun pozuntusuna rast gəlinməmişdir.

Günün sonunda aldığımız  məlumata əsasən, rayon üzrə 27,265 (72,9 faiz) seçici,  dairə  üzrə  isə 30,420 (72 faiz)  seçici səsvermədə iştirak etmişdir.

Səməd HÜSEYNOĞLU,

 “Xalq qəzeti”nin  bölgə müxbiri