Ən əsası diqqət və qayğıdır

Hər bir yenilik,  inkişaf insan amilinə, onun rahatlığına xidmət edəndə  daha faydalı və məzmunlu olur.  Abşeron rayonunun 2013-cü ilin ötən dövründə sosial-iqtisadi inkişafından, abadlıq-quruculuq tədbirlərindən, qazandığı uğurlardan və nailiyyətlərdən material hazırlamaq zərurəti yarananda  öncə bəzi statistik rəqəmlərə nəzər salmaq qərarına gəldim.  Rayon rəhbərliyinin vətəndaşların problem və  qayğıları ilə dərindən   maraqlanması və həlli istiqamətində  müxtəlif tədbirlər görməsi xüsusilə diqqətimi çəkdi.  İndi abşeronlular “bir nömrəli ünvana”-  rayon icra hakimiyyətinə böyük ümidlərlə üz tuturlar. Çünki burada rayon sakinləri ilə münasibət qanunlara və  insan hüquqlarına hörmət  prinsipləri əsasında tənzimlənir.

Elə buna görədir ki, cari  ilin ötən dövründə abşeronlular icra  hakimiyyətinə 1966 müraciət ünvanlayıblar. Onlara operativ münasibət bildirilib. Bundan əlavə, rayon icra hakimiyyətinin başçısı   üç yüzdən çox sakini  qəbul edərək onların problemləri ilə  şəxsən maraqlanıb və nəticədə müvafiq  tədbirlər   görülüb.

Digər vacib bir məqama da toxunmaq lazımdır ki, rayonda məskunlaşmış məcburi köçkünlərin (rəsmi məlumatlara əsasən, hazırda rayonda  33973 (8941 ailə)  məcburi köçkün yaşayır)   müraciətlərinə də həssaslıqla yanaşılır.       Xırdalan şəhərində və  Aşağı  Güzdək  qəsəbəsində məskunlaşmış  məcburi  köçkünlərin  elektrik  enerjisi ilə  təminatındakı   problemləri  aradan   qaldırmaq üçün  bir  ədəd  400  kv-lıq,  bir  ədəd  250  kv-lıq  transformatorun quraşdırılmasını, 3 kilometr uzunluğunda elektrik xəttinin çəkilməsini bu istiqamətdə görülmüş işlərə və silsilə tədbirlərə kiçik bir nümunə kimi göstərmək olar. “Dövlətqaçqınkom”un  sifarişi   ilə  Masazırda  məcburi   köçkünlər   üçün  tikilmiş  15  ədəd  5 mərtəbəli  756  ailəlik  binanın,  540  şagird-yerlik   məktəbin  və  240  yerlik   uşaq  bağçasının  istifadəyə   verilməsi də 2013-cü ilin keçən dövrünün payına düşür.

Rəqəmlər - sürətli  inkişafın göstəricisi

Ölkəmizin iqtisadi  qüdrətinin yüksəlişində Abşeron rayonu da xüsusi çəkiyə malikdir. 2012-ci ilin  birinci yarısı ilə müqayisədə  rayonda sənaye  məhsulunun  ümumi  həcmi 6  faiz  artmaqla  56,9  milyon  manata, nəqliyyat  sektorunda  yük  daşınması 14 faiz artmaqla  568  min  tona, pərakəndə əmtəə dövriyyəsi 5 faiz artmaqla 118,1  milyon manata,  əhaliyə    göstərilən pullu xidmətlər  60 faiz  artmaqla 34,7  milyon  manata çatdırılmışdır.  İlin birinci yarısında   iqtisadi   və  sosial  sahələrin inkişafı  üçün   əsas   kapitala   267,4  milyon  manat  investisiya   yönəldilmişdir  ki,  bu  da   ötən  ilin  eyni   dövrü  ilə   müqayisədə  3,4   dəfə   çoxdur. Tikinti   təşkilatları  öz  imkanları   ilə   cari  ildə  129,1  milyon   manatlıq  və  ya   əvvəlki  ilin   müvafiq   dövrü  ilə  müqayisədə   63  faiz   artıq  tikinti  işləri   görmüşlər. 

Rayonda  10,8  milyon  manatlıq  kənd təsərrüfatı  məhsulları    istehsal  olunmuşdur. Heyvandarlıq sahəsinin artımı bu il də  davam  etmişdir.   İyulun 1-dək  iribuynuzlu  qaramalın sayı  19063  baş,  davarların  sayı 106002  baş,  quşların sayı  isə 803,8  min  baş  olmuşdur. Həmçinin 1223  ton ət, 19061  ton   süd, 31,9  milyon  ədəd   yumurta,  2673  sentner  yun  istehsal  olunmuşdur.  Bu dövrdə  1828  ton  müxtəlif  tərəvəz  yığılmışdır   ki, bu da ötən ilin  müvafiq dövrü  ilə  müqayisədə  51  faiz  artım   deməkdir.  İyulun 1-nə qədər  əkin sahələrindən  840 ton taxıl toplanılmış və məhsul yığımı başa çatdırılmışdır.

Son illər Abşeronda əkinçilik və bağçılıq, üzümçülük  və tərəvəzçilik  sahəsinə maraq göstərən  sahibkarların   sayı  xeyli  artmışdır. Son iki ildə təkcə zeytun bağlarının sahəsi 130 hektar çoxaldılmışdır.

Sözsüz ki, sahibkarlığın   inkişafı  üçün   yaradılmış  əlverişli  şərait   özəl  sektorun  xüsusi  çəkisini artırır.  Məlum dövrdə Sahibkarlığa   Kömək Milli Fondunun xətti ilə  abşeronlu sahibkarlara  42  layihə üzrə 10 milyon  556   min  manat güzəştli   kredit    verilmişdir.

Bizi yollar səsləyir...

Abşeron rayonu ilə bağlı bu yazını hazırlayarkən onun kənd və qəsəbələrinə bir daha yolumu saldım. Çox yox, cəmi 8-9 il əvvələdək Abşeron rayonunun ən ağrılı problemlərindən biri kənd və qəsəbə yollarının tamamilə bərbad halda olması idi. İndi dövlət başçısının sərəncamlarına əsasən ayrılmış vəsaitlər hesabına, həmçinin rayonun daxili imkanları ilə bu sahədə də xeyli iş görülmüş və ürəkaçan vəziyyət yaranmışdır.

Dövlət başçısının 24 may 2012-ci il tarixli  sərəncamı ilə  73 min nəfər əhalinin yaşadığı 5 yaşayış məntəqəsini birləşdirən Saray-Novxanı-Mehdiabad-Fatmayı-Görədil avtomobil yolunun yenidən qurulması üçün ilkin olaraq 4 milyon manat vəsait ayrılmışdır. Ötən dövrdə Saray - Novxanı  istiqamətində bu yolun tikintisi davam etdirilmiş, 20000 kvadratmetrdən çox  asfalt salınmışdır. Bundan əlavə, dövlət başçısının 5 aprel 2013-cü il tarixli sərəncamı ilə 70 min nəfər əhalinin yaşadığı 5 yaşayış məntəqəsini birləşdirən Hökməli-Qobu-Lökbatan-Güzdək-Puta  avtomobil yolunun tikintisi məqsədilə ilkin olaraq ayrılmış 2 milyon manat vəsait hesabına  da intensiv işlər aparılır.

Cari ilin ötən dövrü ərzində daxili imkanlar  hesabına rayonun yaşayış məntəqələrinin  küçə  və  yollarının təmiri də eyni templə  davam etdirilmişdir. Bütövlükdə  rayonun  küçə  və  yollarına 75000 kubmetrdən çox çınqıl-qırmadaş döşənmiş,  101,976   kvadratmetr  sahə  asfaltlanmış, mərkəzi  küçələrin  kənarlarındakı  hasarlara,  evlərin  və  obyektlərin   fasadlarına 2300 kvadratmetr  aqlay,  təbii  qaya  və  çay  daşları  ilə  üz  çəkilmiş,  1339  poqonometr   səki  daşı   düzülmüş,  1073  kvadratmetr  yeni hasar tikilmiş, piyada  səkilərinə  1654  kvadratmetr   tamet    döşənmişdir.

Abşeronda ekoloji vəziyyətin yaxşılaşdırılmasına,    yaşıllaşdırmaya da xüsusi qayğı ilə yanaşılmışdır.  İl başlayandan indiyədək rayon ərazisində   16394  ədəd  ting, 124100  ədəd   dekorativ  gül  əkilmiş,  33900  kvadratmetr  sahədə  süni  çəmənlik  (qazon)   yaradılmışdır.

Kommunikasiya sistemi əsaslı şəkildə yenilənir

Ötən illərdə olduğu olduğu kimi, 2013-cü ildə də abşeronluların elektrik  enerjisi,  təbii  qaz və  su  ilə  təminatına  diqqətlə yanaşılmışdır. Yaşayış  məntəqələrində  müxtəlif  gücə  malik  11  ədəd  transformator  istifadəyə   verilmiş, 733  ədəd  yüksək  gərginlikli, 80 ədəd  0,4  kv-luq  dayaq, 40,9 kilometr naqil, 7396 metr kabel dəyişdirilmiş, 51,8 kilometr özünüdaşıyan izolyasiyalı naqil və 2872 ədəd elektrik  sayğacı   quraşdırılmışdır.    “Azəriqaz” İstehsalat  Birliyinin  sifarişi  əsasında  rayon üzrə  bütövlükdə  müxtəlif  diametrli   borularla 69,4  kilometr  daşıyıcı  və  küçədaxili  qaz  xətləri  çəkilmiş,  7233 ədəd  “Smart-kart”   tipli  elektron sayğac  quraşdırılmışdır. 

Elm Çində də olsa...

1400 il əvvəl İslam peyğəmbəri belə buyururdu: elm Çində də olsa, onun ardınca gedin. Bu mənada son illər Abşeron rayonunda təhsilə ən önəmli sahələrdən biri kimi yanaşılır. Bu il Abşeron rayonu üzrə orta məktəbləri bitirmiş 1461 məzundan 1102-si ali məktəblərə qəbul üçün sənəd vermişdir. Bunlardan 672-si ali məktəblərin tələbəsi adını qazanmışdır. 58 nəfərin balı 500- dən, 16 nəfərin göstəricisi isə 600 baldan çox olmuşdur.

Neçə illik müşahidələrim icra hakimiyyətinin başçısı Zakir Fərəcovun yüksək təşkilatçılıq və quruculuq bacarığına yaxından bələd olmaq imkanı verir. Buna görə də tam səmimiyyətlə deyə bilərəm ki, dövlətin yaratdığı imkanları uğurla təhsilin inkişafına istiqamətləndirməyi bacaran, bu sahənin yüksəlişi üçün qayğısını və köməyini əsirgəməyən rayon rəhbəri kimi onun məhz belə yüksək nəticələr ummağa tam mənəvi haqqı çatır. 

Ötən dərs ilində  Saray qəsəbə 3 saylı tam orta məktəbinin məzunu Günay Nəsirova və Xırdalan şəhər 3 saylı tam orta məktəbinin məzunu Güləndam Cəbiyeva  təlim və tərbiyədə yüksək nailiyyətlərinə görə qızıl medala layiq görülmüşlər. Onlar  ali məktəblərə yüksək nəticələrlə qəbul olaraq aldıqları qızıl medalları doğrultmuşlar.  

Bundan başqa, Güzdək qəsəbə tam orta məktəbinin müəllimi Orucəli Bədəlov, Novxanı kənd 1 saylı tam orta məktəbin direktoru Taliyyə Mirzəyeva, Saray qəsəbə 14 saylı uşaq bağçasının müdirəsi Məhbubə Sadıqova “Əməkdar müəllim” adına layiq görülmüşlər.

Abşeron rayonu sürətlə inkişaf edir. Bu da  məktəblərə şagird axınını gücləndirir. 2012-2013-cü dərs ilində rayonda 76 sinif komplektində 1656 şagird artmışdır. Şagird sıxlığını azaltmaq məqsədilə  Məmmədli kənd tam orta məktəbinin yararsız binası sökülərək yerində 960 şagird yerlik məktəb binası tikilmişdir. Xırdalan şəhər 1 və 7 saylı tam orta məktəblərdə əlavə tədris korpusları tikilməkdədir. Yaşayış massivlərində orta məktəblərə əlavə korpuslar və müasir standartlara cavab verən uşaq bağçaları tikilir.

Mədəniyyət sahəsində görülən işlər barəsində. Bu günə  qədər Xırdalan  şəhərində yerləşən rayon  mədəniyyət   və  istirahət parkında  ötən  ilin ikinci yarısından tikintisinə başlanılmış Heydər Əliyev Mərkəzinin əzəmətli binasının divar-hörgü işləri başa çatdırılmış, akt zalının dam  konstruksiyası tamamlanmışdır.  Hazırda əsas korpusda dam örtüyünün metal   konstruksiyası quraşdırılır  və fasad üzlənir.

Bundan əlavə, Qobu qəsəbəsində 220 tamaşaçı-yerlik  mədəniyyət mərkəzinin tikintisi tamamlanmışdır.

Mədəni- kütləvi tədbirlər sırasında yalnız bunu demək kifayətdir ki, ulu öndər Heydər Əliyevin 90 illik yubileyinə həsr olunmuş silsilə tədbirlər ölkəmizin hər guşəsində olduğu kimi, Abşeron rayonunda da çox təntənəli şəkildə keçirilmiş və abşeronluların yaddaşında uzun illər silinməyəcək izlər və xoş təəssüratlar yaratmışdır. Abşeron rayonunun 50 illik yubileyindən bəhs edən və yüksək səviyyədə keçirilmiş tədbir də sakinlərin hədsiz sevincinə və marağına səbəb olmuşdur.

Abşeron rayonunda əhalinin sağlamlığı üçün bir sıra vacib tədbirlər görülür, xüsusilə yeni tibb müəssisələri tikilir və müasir avadanlıqlarla təchiz olunur.

Tikintisi davam etdirilən yeni rayon  mərkəzi    xəstəxanasının   yeraltı  torpaq  işləri  bu günədək başa  çatdırılmış,  hazırda  zirzəmi  hissəsində   tikinti-quraşdırma  işləri   aparılır. Hökməli  qəsəbəsinin  “Atyalı”  yaşayış  məntəqəsində  yerli  bələdiyyənin   vəsaiti  hesabına  bir  mərtəbəli,   on  bir  otaqlı  həkim  məntəqəsi tikilmişdir. Həmçinin Fatmayı   bələdiyyəsinin   vəsaiti  hesabına  tikilmiş   iki   mərtəbəli,  14  otaqdan  ibarət   həkim  məntəqəsi də  əhalinin   istifadəsinə   verilməyə    hazırdır.

Son illər rayon gəncləri istər bilik və bacarıqlarını nümayiş etdirməkdə, istərsə də  idman yarışlarında məharətlə iştirak edərək uğurlu nəticələr qazanırlar. Bu ilin ötən dövründə rayon  gəncləri ölkə və beynəlxalq turnirlərdə 68 medal  qazanıblar. Onlar beynəlxalq  yarışlardan 12 qızıl, 8 gümüş, 11 bürünc  medalla  qayıdıblar. Şübhəsiz ki, Xırdalan  şəhərində  tikilən  Olimpiya  İdman  Kompleksinin fəaliyyətə başlaması ilə rayon idmançılarının nailiyyətləri daha da çoxalacaq, rayon həm də idman yarışlarının keçirilməsində daha fəal iştirak edəcək. Hazırda kompleksin ikinci mərtəbəsinin yükdaşıyan monolit   konstruksiya-inşaat  işləri   başa   çatdırılmış, metal  konstruksiya  işlərinə   hazırlıq   görülməkdədir.

Bundan başqa, daxili   imkanlar   hesabına  Masazır  kəndində    mövcud  standartlara   uyğun   inşa   edilən   Stadion-İdman   Kompleksi də idmanla intensiv məşğul olmaq üçün əlavə şərait yaradacaq.

Son illərdə rayonda aparılan abadlıq işləri, səliqə-sahman, yeni su və kanalizasiya xətlərinin çəkilməsi, yaşıllıqların salınması infeksion xəstəliklərin azalmasına səbəb olmuşdur.

Son 3 ildə rayonda heç bir xüsusi təhlükəli infeksion xəstəlik, kütləvi qida zəhərlənmələri, idarə olunan infeksiyalar qeydə alınmamışdır. Bunun  səbəbi hər bir infeksion xəstəliyin vaxtında aşkarlanması, hospitalizasiyası, xəstələrin xəstəxanadan çıxdıqdan sonra dispanser qeydiyyatına alınması, xəstəlik ocaqlarında tamamlayıcı dezinfeksiya işlərinin aparılmasıdır.

1 yaşa qədər uşaqların peyvəndə cəlb olunması, demək olar ki, tam şəkildə həyata keçirilmişdir.

Son 4-5 il ərzində rayonun sanitariya təmizliyinə nəzarət zamanı Xırdalan şəhərində, qəsəbə və kəndlərdə 250-yə yaxın qeyri-qanuni zibillik ləğv olunmuş, 96 yerdə yeni zibil meydançası tikilmiş, 500-ə qədər konteyner gətirilmiş, 12 ədəd yeni zibil daşıyan maşın alınmış, zibillərin gündəlik daşınması qrafik əsasında təşkil olunaraq yaxşılaşdırılmışdır.

Yeniləşən binalar rayonun simasına xüsusi yaraşıq verir

Abşeronun şəhər, qəsəbə  və  kəndlərinin simasını dəyişən  abadlıq-quruculuq işlərində rayonun təmir-tikinti təşkilatları və Mənzil-kommunal təsərrüfatı istehsalat birliyi yaxından iştirak edir. Cari  ilin  birinci  yarısında da bu işlər uğurla  davam  etdirilmiş, mənzil  fondunun   saxlanılması    istiqamətində konkret   tədbirlər  həyata  keçirilmişdir. Xırdalan   şəhərində     25,  26,  27  və  28-ci  məhəllələrdə səkkiz  beşmərtəbəli   yaşayış  binasının pilləkan  qəfəsələri əsaslı  təmir  olunmuşdur. 20, 27 və 30-cu  məhəllələrdə 15 çoxmərtəbəli, çoxmənzilli yaşayış  binasının giriş və zirzəmi qapılarının,  mərtəbələrarası pəncərələrinin  dəyişdirilməsi, pilləkən   qəfəsələrinin  əsaslı  təmiri davam etdirilir.

2013-cü ilin ötən dövründə Xırdalan  şəhərində on  Mənzil  Tikinti Kooperativi tərəfindən  5,  7,  9,  12  və  18  mərtəbəli 34   yaşayış  binasının tikintisi    davam   etdirilmişdir.

Keçmiş Bakı  quşçuluq  fabrikinin   ərazisində 23  bir   girişli,  3  mərtəbəli   yaşayış  binası   istifadəyə  verilmişdir.      Müvafiq dövrdə  Masazır   kəndindəki    “Qurtuluş-93”   və “Yeni  Bakı”  MTK-lar   tərəfindən  üç  ədəd   iki   girişli,  beş  mərtəbəli,  üç  ədəd   bir  girişli,  on   mərtəbəli,  bir  ədəd üç girişli,  12  mərtəbəli   yaşayış   binaları  istifadəyə  verilmişdir. “Mehdiabad  Gənclər  Şəhərciyi”ndə  dörd  ədəd 6 mərtəbəli   yaşayış   evi  istismara qəbul  edilmiş, dörd  qrupluq özəl  uşaq   bağçasında  isə  son tamamlama   işləri  görülməkdədir.

2013-cü ilin ötən dövrü ərzində 400-dən çox vətəndaşa pensiya təminatı aparılmışdır. 1230  ailənin 4929  üzvünə  ünvanlı   sosial   yardım   təyin  edilmişdir.  1824  vətəndaş  üçün   telefon  çəkilmiş, hər   100  ailəyə   düşən  telefon   aparatlarının  sayı   95  ədədə,  internet   istifadəçilərinin  sayı  isə  ümumi   telefon  istifadəçilərinin  97 faizinə  çatdırılmışdır. Rayon poçtamptının  tabeliyindəki  24  poçt  şöbəsi   və  1  poçt   agentliyi  tarif  gəlirləri proqnozuna artıqlaması ilə əməl etmişdir. Rayon  məşğulluq   mərkəzi vasitəsilə 515   300-dən çox vətəndaş işə düzəlmişdir. Rayonda 1500-ə yaxın  yeni iş yeri açılmışdır. RİH  başçısı  yanındakı   Büdcədənkənar  İnkişaf  və Bərpa  Fondundan ehtiyacı olanlara 40000  manatdan çox yardım   olunmuşdur.

... Bu ardıcıllıqla Abşeron rayonunda görülmüş işləri sıralasaq, heç şübhəsiz ki, uzun bir siyahı alınar. Əslində buna ehtiyac da yoxdur. Amma bir məsələ dəqiqdir: rayon inkişaf edir, abadlaşır, gözəlləşir. Və bu yüksəliş abşeronların ürəyincədir.

Səməd HÜSEYNOĞLU,                                                        

 “Xalq qəzeti”nin bölgə müxbiri