“Azad Azərbaycan” Müstəqil Teleradio Kompaniyası (ATV) 9 oktyabr prezident seçkilərində “exit-poll” təşkil edəcəkdir.

Kompaniyadan AzərTAc-a bildirilmişdir ki, bu məqsədlə seçkiqabağı vəziyyətin öyrənilməsi, seçki günündə “exit-poll”un keçirilməsi üzrə ixtisaslaşmış və təcrübəli beynəlxalq tədqiqat şirkətlərinin fəaliyyəti barədə araşdırma aparılmışdır. Nəticədə fəaliyyəti, ictimai rəyin öyrənilməsi ilə bağlı təcrübəsi, indiyədək apardığı tədqiqatları, xüsusilə də ciddi reputasiyası nəzərə alınaraq mərkəzi qərargahı Fransada yerləşən “OpinonWay” Tədqiqat İnstitutuna müraciət edilmişdir. Beləliklə, cari ilin iyul ayından etibarən ATV ilə “OpinonWay” arasında danışıqlara başlanılmış və avqustun sonunda tərəflər müqavilə imzalamışlar. Bu institut sahə işlərinin həyata keçirilməsi, texniki dəstək üçün yerli tərəfdaş kimi “Konstitusiya” Araşdırmalar Fondunu seçmişdir.

Müqavilənin şərtlərinə əsasən seçkiqabağı vəziyyətin qiymətləndirilməsi məqsədilə sentyabrın 23-29-da respublikanın bütün ərazisini əhatə etməklə ictimai rəy sorğusu keçirilmişdir. Sorğunun nəticələri ATV vasitəsilə “OpinonWay” Tədqiqat İnstitutunun  nümayəndəsi Bruno Janbart tərəfindən açıqlanmışdır.

Səsvermə günü 64 seçki dairəsini əhatə etməklə 99 seçki məntəqəsində “exit-poll”un keçirilməsi nəzərdə tutulmuşdur. İlkin nəticələrlə bağlı gün ərzində üç dəfə (saat 13:00, 16:00 və 18:00-da) məlumat açıqlanacaqdır. Səsvermə bitdikdən sonra isə yekun nəticələr ictimaiyyətə təqdim olunacaqdır.