Azərbaycan Milli Məclisinin deputatı və Kikboksinq Federasiyasının prezidenti Adil Əliyev Türkiyə-Azərbaycan iqtisadi, sosial və mədəni əlaqələrinin güclənməsində göstərdiyi xidmətlərə görə qardaş ölkənin  “Avrasiya Xidməti Nişanı”na layiq görülüb.

Kastamon Bələdiyyə rəhbərliyi tərəfindən keçirilən 17-ci Türk Dünyası Günləri çərçivəsində Türkiyənin siyasət, elm, mədəniyyət və s.sahələrini təmsil edən şəxslərin iştirakı ilə keçən tədbirdə fəxri mükafat Adil Əliyevə təqdim olunub. Mərasimdə çıxış edən Kastamon Bələdiyyə sədri Ərdoğan Bektaş türk dünyasının şanlı keçmişindən, cahanda əmin-amanlığa töhfəsindən geniş söz açıb.

Soydaşımız Adil Əliyev Türkiyə ilə Azərbaycan arasında iqtisadi, sosial və mədəni sahələrdə həyata keçirilən və nəzərdə tutulan layihələr haqqında ətraflı məlumat verib. Millət vəkili Ermənistanın törətdiyi misilsiz Xocalı qırğınından da bəhs edərək, bu bəşəri cinayətin cəzasız qaldığını vurğulayıb.

Azərbaycanlı sənətçilər Azərin və aşıq Sevilin ifaları Türkiyə-Azərbaycan birliyinə çağırış kimi səslənib.

Vazeh Əliyev, “Xalq qəzeti”