22 iyul - milli mətbuatgünü münasibətilə Sumqayıt Şəhər İcra Hakimiyyətində media nümayəndələri ilə görüş keçirilib.
Şəhər icra hakimiyyətinin başçısı Vaqif Əliyev jurnalistləri təbrik edərək bildirdi ki, 10 iyun 2010-cu il tarixdə Prezident İlham Əliyev "Azərbaycan milli mətbuatının 135 illik yubileyinin keçirilməsi haqqında" sərəncam imzalamış, bununla əlaqədar mətbuatın inkişafına yönəldilən bir sıra tədbirlər müəyyənləşdirilmiş və həyata keçirilmişdir. Mətbuat Şurasının yeni binasının açılışı, "Gülüstan" sarayında yubiley mərasiminin keçirilməsi, mətbuat işçilərinin sosial müdafiəsinin gücləndirilməsi, KİV-lərə birdəfəlik maliyyə yardımının göstərilməsi, mətbuat işçilərinə fəxri adların verilməsi və onların təltif edilməsi haqqında Prezident sərəncamlarının jurnalist əməyinin stimullaşdırılmasında böyük önəmi olub.
Milli mətbuat tarixinə qısa ekskurs edən natiq bildirdi ki, şanlı ənənələr üzərində pərvəriş tapan müstəqil dövlətimizin çağdaş media korpusu həyatımızda baş verən güclü inkişaf meyllərinin təbliğində, iqtisadiyyat, elm və mədəniyyət sahələrində qazanılan uğurların işıqlandırılmasında mühüm rol oynayır. Sumqayıtda da bir çox istedadlı, peşəkar, obyektiv, qərəzsiz media təmsilçiləri yaşayıb-işləyir, nailiyyətlərimizə bizimlə birgə sevinir, uğurlarımızı həvəslə qələbə alırlar. Vaqif Əliyev çətin və şərəfli jurnalist peşəsinin sahiblərinə ən xoş arzularını çatdırdı. Onlara hədiyyələr təqdim olundu və sonra yubiley tədbiri bayram süfrəsi arxasında davam etdi.{nl}

Ə.ƏLİYEV, "Xalq qəzeti"