Bu ilin 6 ayı ərzində Azərbaycan Respublikası Dövlət Sosial Müdafiə Fonduna (DSMF) xarici ölkələrin sığorta-pensiya qurumları, əcnəbi vətəndaşlar və xaricdə yaşayan Azərbaycan Respublikası vətəndaşları tərəfindən daxil olan müraciətlərin sayı artıb. Bu barədə fondun ictimaiyyətlə əlaqələr sektorundan bilidiriblər. Ötən ilin müvafiq dövrü ilə müqayisədə bu qəbildən olan müraciətlər 33 faiz çoxalıb.
Cari ilin birinci yarımilində DSMF-yə daxil olan 1147 müraciət arasında MDB ölkələrindən ünvanlanan müraciətlər üstünlük təşkil edib. Qeyd olunan dövr ərzində fonda MDB ölkələrindən 800 müraciət göndərilib. Bu müraciətlərin mövzusu vətəndaşların pensiya hüququnun təmin edilməsi ilə bağlı zəruri hesab olunan müvafiq rəsmi sənədlərin hazırlanaraq təqdim olunması, konkret hallar üçün zəruri ikitərəfli münasibətlərin tənzimlənməsindən ibarətdir.
Müraciətlərin sayına görə növbəti yerdə isə Türkiyə Cümhuriyyəti gəlir və qardaş ölkədən Fonda 73 müraciət ünvanlanıb. Bu müraciətlərin mövzusu Türkiyə və Azərbaycan respublikaları arasında sosial müdafiə sahəsində ikitərəfli sazişə uyğun olaraq vətəndaşların sosial sığorta və pensiya hüquqlarının gerçəkləşdirilməsi məqsədi ilə konkret tədbirlərin görülməsi istiqamətindədir.
DSMF-yə daxil olan digər 274 müraciət isə ayrı-ayrı xarici ölkələrin payına düşüb.{nl}

Z. BƏŞİRQIZI, "Xalq qəzeti"