İyulun 9-da Azərbaycan Respublikasının fövqəladə hallar naziri, general-polkovnik Kəmaləddin Heydərov Əfqanıstanın daxili işlər naziri Qulam Mujtaba Patangın rəhbərlik etdiyi nümayəndə heyəti ilə görüşmüşdür. 

Fövqəladə Hallar Nazirliyindən AzərTAc-a bildirmişlər ki, görüşdə nazir Kəmaləddin Heydərov FHN və onun qurumları, eyni zamanda, nazirlik tərəfindən həyata keçirilən layihələr barədə ətraflı məlumat vermişdir. O, həmçinin fövqəladə halların idarə edilməsi sahəsində zəngin təcrübəyə malik dövlətlərin müvafiq qurumları ilə, habelə beynəlxalq və regional təşkilatlarla əlaqələrin inkişaf etdirilməsi istiqamətində görülən işlərdən danışmışdır.

Qonaq hər iki ölkənin müvafiq dövlət qurumları arasında əməkdaşlığın dərinləşməsinin vacibliyini vurğulamışdır.

Görüşdə, həmçinin Əfqanıstan İslam Respublikasının müvafiq qurumlarının əməkdaşlarının Fövqəladə Hallar Nazirliyinin Akademiyasında gələcəkdə uzunmüddətli təhsil almaları perspektivləri müzakirə olunmuşdur.

Sonra nümayəndə heyəti nazirliyin Böhran Vəziyyətlərində İdarəetmə Mərkəzinin fəaliyyəti ilə yaxından tanış olmuşdur.