İtaliyanın xarici işlər naziri Emma Bonino Azərbaycan qazının Avropaya nəqli üçün TAP layihəsinin seçilməsini alqışlamışdır.

APA-nın İtaliya XİN-in mətbuat xidmətinə istinadən xəbərinə görə, E.Bonino yaydığı bəyanatda bildirmişdir ki, TAP kəmərinin seçilməsi Cənub Qaz Dəhlizinin tamamlanması istiqamətində konkret addım olmuşdur: “Bu, Avropanın enerji təhlükəsizliyi və rəqabət qabiliyyətinin gücləndirilməsi, eləcə də İtaliyanın aparıcı ticarət tərəfdaşlarından olan Azərbaycanla ikitərəfli münasibətlərimizin genişləndirilməsi yolunda da mühüm addımdır”.

 Qeyd edək ki, Azərbaycan “Şahdəniz-2” layihəsi çərçivəsində hasil ediləcək təbii qazın Avropaya çatdırılması üçün boru kəmərinin seçilməsi ilə bağlı qəbul etdiyi qərarı iyunun 28-də rəsmən açıqlamışdır. “Şahdəniz” konsorsiumu son iki il ərzində Avropaya qazın nəqli üçün boru kəmərinin bir neçə seçim variantını nəzərdən keçirmiş və TAP (Trans Adriatik Pipeline) üzərində dayanmışdır. Uzunluğu 870 km olacaq TAP kəməri Azərbaycan qazını Türkiyə, Yunanıstan və Albaniya ərazisi ilə İtaliyaya çatdıracaq. Layihənin ümumi dəyəri təxminən 2,2 mlrd. ABŞ dolları təşkil edir.

 TAP layihəsinin əsas mənbəyi “Şahdəniz”in ikinci fazası çərçivəsində hasil olunacaq qazdır. Proqnozlara əsasən, ikinci fazada hasilata 2016-cı ildə başlanacaq və TAP kəmərinin tikintisinə 3 il tələb olunacaq. İlkin mərhələdə qaz kəməri ilə ildə 10 mlrd. kubmetr mavi yanacaq Avropaya çatdırılacaq, daha sonra isə həcm 20 milyard kubmetrədək artırılacaq.

 Hazırda layihənin 3 səhmdarı var, bunlar “EGL”, “Statoil” və “E.ON Ruhrgas” şirkətləridir.