İyunun 28-də Azərbaycanın Türkiyədəki səfirliyi Azərbaycan Respublikası Silahlı Qüvvələrinin yaranmasının 95-ci ildönümü münasibətilə Ankaradakı “Park Hotel” mehmanxanasında tədbir keçirmişdir.

Səfirlikdən bildirmişlər ki, tədbirdə Türkiyənin müdafiə nazirinin müavini, general-polkovnik Ümit Dündar, Silahlı Qüvvələrin Baş Qərargahının kəşfiyyat departamentinin rəisi, general-polkovnik Yaşar Güler, Silahlı Qüvvələrin Baş Qərargahının əməliyyat departamentinin rəisi, general-polkovnik Erdal Öztürk, Jandarm Qüvvələri Komandanlığının qərargah rəisi, general-polkovnik Osman Eker, Quru Qüvvələri Komandanlığının qərargah rəisi, general-polkovnik Salih Zeki Çolak, Hava Qüvvələri Komandanlığının qərargah rəisi, general-polkovnik Nezih Damcı, Dəniz Qüvvələri Komandanlığının qərargah rəisi, general-polkovnik Veysel Kösele, digər yüksək rütbəli zabitlər, Ankarada təhsil alan kursantlarımız,  diplomatik korpusun rəhbərləri, təmsilçiləri və hərbi attaşeləri, elm və incəsənət xadimləri, KİV nümayəndələri iştirak etmişlər.

Azərbaycanın və Türkiyənin dövlət himnləri səsləndirilmişdir. Sonra ümummilli lider Heydər Əliyevin Azərbaycanda ordu quruculuğu sahəsindəki əvəzsiz xidmətlərindən bəhs edən sənədli film nümayiş etdirilmişdir. Daha sonra ziyafət verilmişdir.

Tədbir iştirakçılarına səfirliyin türk dilində nəşr etdirdiyi “İlham Əliyev” və “Heydər Əliyev” kitabları və “İrs-Miras” və “Diplo Atlas” jurnalları təqdim olunmuşdur.

AzərTAc