Bölgələrin inkişafı üçün qəbul edilmiş infrastruktur layihələrinin vaxtında və yüksək keyfiyyətlə yerinə yetirilməsi insanların dövlətimizə və onun başçısına olan inam və sədaqət hissini daha da artırır.

Ölkə Prezidenti cənab İlham Əliyevin müvafiq sərəncamına əsasən inşasına bu ilin aprel ayında başlanan   Quba-Küpçal-Küsnət yolunda işlər sürətlə davam etdirilməkdədir. Quba rayonunun Küpçal kənd inzibati ərazi vahidliyində yerləşən və 6  kəndi birləşdirən 28 kilometrlik bu yolun artıq 20 kilometrlik hissəsində torpaqtəmizləmə işləri görülüb qurtarmış, asfalt örtüyü döşənmişdir. Mürəkkəb landşafta malik, yüksək dağlıq ərazilərdən keçən və çoxlu sərt döngələri olan bu yola asfalt salınması neçə illər idi ki, kənd sakinlərinin arzusu idi. Artıq onların bu arzusu reallaşmışdır.

Respublika Nəqliyyat Nazirliyinin “Azəryolservis” ASC-nin bir saylı Yol İstismar İdarəsinin rəisi, əməkdar mühəndis Saleh Məmmədov bu yolun çəkilişinin təcrübəli sahə rəislərindən Elxan Məhərrəmova və Nəsir Əsədova tapşırıldığını deyir. O eyni zamanda kənd sakinlərinin yol işçilərinə böyük qayğı və hörmətlə yanaşdıqlarını bildirir. Kənd ağsaqqallarından Şahkərəm Əliyev, Qurban Poladov, İkram Vəliyev, Niyazi Ramazanov Quba-Küpçal-Küsnət yolunun çəkilməsində xidmətləri olan bütün yol işçilərinə öz dərin minnətdarlıqlarını bildirirlər.

Rəhim VƏLİYEV