Azərbaycan Mətbuat Şurası və  “Vergilər” qəzetinin birgə elan etdiyi “Heydər Əliyev və Azərbaycanda vergi siyasəti” mövzusundakı müsabiqənin qaliblərinin mükafatlandırılması mərasimi keçirilmişdir.

Mətbuat Şurasının sədri Əflatun Amaşov bildirmişdir ki, respublikamızda vergi islahatları özünün dinamizmi və beynəlxalq standartların tətbiqilə böyük uğur qazanmış və hazırda Azərbaycan çevik vergi modelinə malik ölkələrdən biridir. Vergilər Nazirliyi Heydər Əliyevin müəyyənləşdirdiyi xətti daim rəhbər tutaraq fəaliyyət göstərir. Bu gün burada toplaşmağımız da həmin xəttə sadiqliyin bir nümunəsidir.

“Vergilər” qəzetinin baş redaktoru Anar Əliyev çıxışında müsabiqə ilə bağlı ətraflı məlumat vermişdir. O bildirmişdir ki, həyata keçirilmiş təşəbbüsdə məqsəd Azərbaycanın müasir vergi sistemi ilə bağlı yeniliklərin və məlumatların cəmiyyətə çatdırılmasında peşəkar jurnalist yaradıcılığını stimullaşdırmaqdan ibarətdir.

Xatırladaq ki, müsabiqəyə ümumilikdə 44 yazı təqdim olunmuşdur. Üç istiqamət  üzrə birinci, ikinci və üçüncü yeri tutanlar mükafatlandırılmış, 35 jurnalist isə həvəsləndirici mükafata layiq görülmüşdür.

“Xalq qəzeti”