Ölkəmizdə səfərdə olan Gürcüstanın daxili işlər naziri İrakli Ğaribaşvilinin başçılıq etdiyi nümayəndə heyəti mayın 21-də Azərbaycan Respublikasının fövqəladə hallar naziri,  general-polkovnik Kəmaləddin Heydərov ilə görüşmüşdür.

Fövqəladə Hallar Nazirliyinin mətbuat xidmətindən AzərTAc-a bildirmişlər ki, görüşdə nazir Kəmaləddin Heydərov Azərbaycan və Gürcüstan arasında dostluq əlaqələrinin sürətli inkişafından söhbət açmışdır. Nazir hər iki ölkənin müvafiq dövlət qurumları arasında mövcud əməkdaşlıq münasibətlərinin inkişaf etdirilməsi perspektivlərindən danışmışdır. K.Heydərov respublikada fövqəladə halların idarə olunması sahəsində görülən işlər, nazirliyin strukturuna daxil olan qurumların fəaliyyəti barədə qonağa ətraflı məlumat vermişdir.

Qonaq ölkələrimiz arasında aidiyyəti qurumların əməkdaşlıq əlaqələrinin daha da genişləndirilməsi və inkişaf etdirilməsinin vacibliyini vurğulamışdır.

Görüşdə imzalanması nəzərdə tutulan “Azərbaycan Respublikasının Hökuməti və Gürcüstan Hökuməti arasında fövqəladə halların nəticələrinin azaldılması, məhdudlaşdırılması və qarşısının alınması sahələri üzrə əməkdaşlığa dair Saziş” layihəsi də müzakirə edilmişdir.

Sonda nümayəndə heyəti Fövqəladə Hallar Nazirliyinin Böhran Vəziyyətlərində İdarəetmə Mərkəzinin fəaliyyəti ilə yaxından tanış olmuşdur.