Mayın 13-17-də xalqımızın ümummilli lideri Heydər Əliyevin 90 illik yubileyi ilə əlaqədar Makedoniyanın Skopye şəhərində Azərbaycan Dövlət Gömrük Komitəsinin təşkilatçılığı ilə bir sıra tədbirlər keçirilmişdir.

AzərTAc xəbər verir ki, bu məqsədlə Dövlət Gömrük Komitəsinin sədri, gömrük xidməti general-leytenantı Aydın Əliyevin rəhbərlik etdiyi nümayəndə heyəti Makedoniyada səfərdə olmuşdur.

Səfər çərçivəsində Makedoniya Gömrük Xidmətinin rəhbərliyi ilə görüş, Müqəddəs Kiril və Mefodi Universitetində ümummilli lider Heydər Əliyevin 90 illik yubileyi və Azərbaycan gömrüyünün inkişafında roluna həsr olunmuş təntənəli mərasim, daha sonra “Chifte Amam” qalereyasında “Gömrük mədəni irsin keşiyində” adlı sərgi keçirilmişdir.

Sərginin açılışında Makedoniyanın Mədəniyyət naziri xanım Elizabeta Kanceska-Milevska, Gömrük İdarəsinin baş direktoru Vanco Kargov, diplomatik korpusun, ictimaiyyətin və kütləvi informasiya vasitələrinin nümayəndələri iştirak etmişlər.

Mayın 16-da isə Skopyenin Opera və Balet Teatrında Azərbaycan və Makedoniya incəsənət ustalarının konserti təşkil olunmuşdur.