Şuşanın işğalının növbəti ildönümü ilə əlaqədar təxminən 2 min nəfər şuşalı Şəhidlər Xiyabanını ziyarət etmiş, orada Azərbaycanın azadlığı və suverenliyi naminə canlarından keçmiş igid vətən övladlarının xatirəsini ehtiramla yad etmiş, onların məzarları önünə tər çiçəklər qoymuşlar. “Əbədi məşəl” memorialının önünə əklil qoyulmuşdur.

“Azərbaycan Respublikasının Dağlıq Qarabağ bölgəsinin Azərbaycanlı İcması” İctimai Birliyinin rəhbəri Bayram Səfərov jurnalistlərə verdiyi müsahibəsində qeyd etmişdir ki, erməni tərəfi danışıqlar prosesini uzatmağa çalışır.

B.Səfərov demişdir: “Onlar bu yolla vaxt qazanmaq və Qarabağın əzəli Azərbaycan torpaqlarını erməniləşdirmək istəyirlər, lakin bu planlar puç olmağa məhkumdur, çünki biz öz torpaqlarımızı sülh yolu ilə, yaxud hərbi yolla qaytaracağıq. Bu məsələdə biz Ali Baş Komandan İlham Əliyevin fəaliyyətini bütünlüklə dəstəkləyirik”.

AzərTAc