Ukraynanın Nikolayev vilayətində fəaliyyət göstərən Heydər Əliyev adına Mədəniyyət və Təhsil Mərkəzinin sədr müavini Yunus Əliyevin şəxsi təşəbbüsü və maliyyə dəstəyi ilə inşa olunan 416-cı Azərbaycan divizyasının xatirə kompleksində tikinti və abadlıq işləri sona çatmaqdadır.

Azərbaycan Televiziyasının Ukrayna və Şərqi Avropa ölkələri üzrə nümayəndəliyinin APA-ya verdiyi məlumata görə, Nikolayev şəhərində yaşayan azərbaycanlılar abidə kompleksinin önündə iməcilik keçirərək ərazidə yaşıllıq zolağı salmışlar.

Mayın 8-də  açılacaq abidə kompleksində 416-cı diviziyada döyüşən azərbaycanlıların adları, diviziyanın Mozdokdan Berlinə qədər keçdiyi döyüş yolunu əks etdirən xəritə lövhəsi, əbədi məşəl və diviziyanın təltif olunduğu orden və medalların stendi quraşdırılacaq. Kompleksin üzərində Azərbaycan bayrağı dalğalanacaq.