Xəzərin Azərbaycan sektorunda sualtı seysmik stansiyalar quraşdıracaq Amerikanın “Kinemetrics” şirkətinin nümayəndələri Bakıya gəlmişlər.

Bu barədə APA-ya AMEA-nın Respublika Seysmoloji Xidmət Mərkəzinin baş direktoru Qurban Yetirmişli məlumat vermişdir.

Onun sözlərinə görə, bir həftə davam edəcək səfər müddətində “Kinemetrics” şirkətinin əməkdaşları ARDNŞ-nın, “Xəzərdənizneftqaz” Layihə İnstitutunun, Respublika Seysmoloji Xidmət Mərkəzinin nümayəndələri və stansiyaları quraşdıracaq dalğıclarla müzakirələr aparacaqlar: “Sualtı stansiyaların layihələndirməsi artıq başa çatmaq üzrədir. Sualtı stansiyalar payıza qədər quraşdırılacaq”.

Q. Yetirmişli demişdir ki, stansiyaların təhlükəsizliyi tam təmin olunacaq. Stansiyalar dənizin dibində, ötürücülər isə platformada qurulacaq.

Xəzərin Azərbaycan sektorunda sualtı seysmik stansiyaların quraşdırılması üçün Amerikanın “Kinemetrics” şirkəti ilə müqavilə 2011-ci ildə bağlanılmışdır. Stansiyalar “Ümid”, “Günəşli” və “Bahar” yataqlarında quraşdırılacaq. Bu, MDB məkanında quraşdırılacaq ilk sualtı stansiyalar olacaq. Ümumiyyətlə, Xəzərin Azərbaycan sektorunda, İrandan tutmuş Rusiya ilə sərhədə qədər 10 sualtı seysmik stansiyanın quraşdırılacağı gözlənilir.