Aprelin 24-də Quba rayon ictimaiyyətinin nümayəndələri Heydər Əliyev Fondunu ziyarət etmişlər. AzərTAc xəbər verir ki, ümummilli lider Heydər Əliyevin anadan olmasının

90 illiyi ilə əlaqədar ziyarətə gələn qubalılara Fondun fəaliyyəti haqqında məlumat verilmişdir.

Bildirilmişdir ki, Fond Ümummilli Liderin zəngin irsini öyrənir və təbliğ edir, müxtəlif sosial-iqtisadi, mədəni layihələr həyata keçirməklə Azərbaycanın tərəqqisinə, mədəniyyətinin və tarixinin təbliğinə kömək göstərir.

Qubalılara Heydər Əliyevin şəxsi arxivindən götürülmüş və onun fəaliyyətinin ayrı-ayrı dövrlərini əhatə edən, ulu öndərin həyatının ən müxtəlif məqamlarını əks etdirən, tariximizin bütöv bir dövrü barədə geniş təsəvvür yaradan şəkillər və eksponatlar nümayiş etdirilmişdir. Onlar görkəmli siyasi xadimin uşaqlıq və gənclik illərinə, Moskvada keçmiş SSRİ-nin rəhbərlərindən biri kimi genişmiqyaslı fəaliyyətinə aid materiallara, Bakı-Tbilisi-Ceyhan əsas neft ixrac boru kəmərinin keçdiyi ərazilərin maketinə də baxmışlar.

Sonda qonaqlar Heydər Əliyevin ömür yolundan bəhs edən “Böyük ömrün anları” sənədli filminə baxmışlar.

AzərTAc