“Aprelin 15-nə qədər Azərbaycanın zəlzələ baş vermiş 3 rayonunda Qax, Balakən və Zaqatalada 3245 fərdi yaşayış evinin tikintisi başa çatdırılmışdır”.

 APA-nın xəbərinə görə, bunu Zaqatalada fövqəladə hallar naziri, general-polkovnik Kəmaləddin Heydərov demişdir.

Nazirin sözlərinə görə, təhvil verilən evlərdən 292-si Qaxda, 203-ü Balakəndə, 2750-si Zaqataladadır.

Hazırda 1847 qəzalı evin tikintisi davam etdirilir.

Nazir istifadəyə verilən məktəblərlə birlikdə 26 məktəb binasının və 1 uşaq bağçasının istifadəyə verildiyini də qeyd etmişdir. Qısa müddətdə Zaqatalada 8, Qaxda 1, Şəki şəhərində 1 məktəb binası tikilib istifadəyə veriləcək.

Nazir onu da bildirmişdir ki, indiyə qədər əhaliyə 17 milyon 734 min manat yardım paylanılmışdır, bu vəsait əhaliyə poçt vasitəsilə ödənilmişdir.