Azərbaycan Respublikasının Baş naziri Artur Rasizadə martın 18-də Gürcüstanın xarici işlər naziri Maya Pancikidzenin başçılıq etdiyi nümayəndə heyəti ilə görüşmüşdür.

Baş nazir Artur Rasizadə qeyd etmişdir ki, strateji tərəfdaşlıq səviyyəsində olan Azərbaycan-Gürcüstan münasibətləri bütün istiqamətlər üzrə fəal inkişaf edir. Baş nazir iki ölkə arasında xüsusilə iqtisadi sahədə əlaqələri yüksək qiymətləndirmişdir.

Azərbaycan hökumətinin başçısı ikitərəfli əlaqələrin inkişafının regionun ümumi vəziyyətinə müsbət təsir göstərdiyini vurğulamışdır.

Gürcüstanın xarici işlər naziri Maya Pancikidze “Terrorizmin qarşısının alınmasında əməkdaşlığın gücləndirilməsi” mövzusunda Bakıda təşkil olunan beynəlxalq konfransın əhəmiyyəti barədə danışmışdır.

Maya Pancikidze Gürcüstanın Azərbaycana dost olduğunu, bütün beynəlxalq tədbirlərdə ölkəmizin mövqeyini dəstəklədiyini vurğulamışdır.

Görüşdə Azərbaycan ilə Gürcüstan arasında ikitərəfli münasibətlərin inkişafına dair fikir mübadiləsi aparılmışdır.

AzərTAc