Azərbaycanda hər gün orta hesabla 400-dən çox uşaq doğulur
2010-cu il iyul ayının 1-i vəziyyətinə Azərbaycan Respublikasının əhalisinin sayı ilin əvvəlindən 50 min nəfər artaraq 9 milyon 47 min nəfərə çatmışdır. Əhalinin 54 faizi şəhər, 46 faizi kənd yerlərində yaşayır.
Azərbaycan Respublikası Dövlət Statistika Komitəsinin məlumatına görə, ölkə əhalisinin 49 faizini kişilər, 51 faizini qadınlar təşkil edir, 22 faizi 0-14 yaşda, 71 faizi 15-64 yaşda, 7 faizi 65 və yuxarı yaşda olanlardır. 14-19 yaşlı gənclər ölkə əhalisinin 31 faizini təşkil edir. Hesablamalara görə cari ildə doğulan körpələr üçün gözlənilən ömür uzunluğu 73,5 yaş, o cümlədən oğlanlar üçün 70,9 yaş, qızlar üçün 76,1 yaşdır.
Cari ilin birinci yarısında Azərbaycanda 76,3 min, gündə təxminən 421 körpə doğulmuş, ötən ilin müvafiq dövrü ilə müqayisədə əhalinin hər 1000 nəfərinə düşən nikahların sayı 7,3-dən 7,4-ə qədər artmış, boşanmaların sayı isə dəyişməyərək eyni səviyyədə qalmışdır. Birinci nikaha daxil olan kişilərin orta yaş həddi 27, qadınlar arasında 23 yaş olmuşdur.
İlin altı ayı ərzində Daxili İşlər Nazirliyinin müvafiq orqanları tərəfindən daimi yaşamaq üçün Azrbaycana 1,1 min nəfərin gəldiyi və 0,4 min nəfərin ölkədən getdiyi qeydə alınmışdır.

T.ƏLİYEV, "Xalq qəzeti"