Dənizdə neft-qaz əməliyyatlarının həyata keçirilməsi zamanı dalğıc işi xüsusi əhəmiyyət daşıyır. Sualtı boru kəmərlərinin çəkilməsi, müayinəsi, müxtəlif zədələnmələrin aşkar edilməsi, təmiri, gəmilərin və hidrotexniki qurğuların sualtı hissəsinin yoxlanılması kimi mühüm işlərdə dalğıcların rolu əvəzsizdir.

Təlim, Tədris və Sertifikatlaşdırma İdarəsinin Dənizdə insan həyatının mühafizəsi üzrə təlim mərkəzində  aprel ayının 1-dən etibarən birinci və ikinci iş qrupu üzrə 4-cü dərəcəli istehsalat dalğıcları kursunun fəaliyyətə başlaması planlaşdırılır. Hazırda hazırlıq işləri gedir. Kursda dalğıcların hazırlığına nəzarət və təlimin təşkil edilməsi mərkəzin dalğıc mütəxəssislərinə həvalə edilmişdir.

Azərbaycan Dövlət Neft  Şirkətindən verilən məlumatda bildirilir ki, dalğıc peşəsinə yiyələnmək istəyən 193 nəfər elektron ərizə ilə şirkətə müraciət etmiş, bir neçə seçim mərhələsindən sonra 23 namizəd sonuncu test imtahanı mərhələsinə keçmək hüququ qazanmışdır. Həmin namizədlərlə yekun test imtahanı fevralın 28-də Təlim, Tədris və Sertifikatlaşdırma İdarəsində keçirilmişdir. Namizədlərin seçimində  ARDNŞ-nin İnsan Resursları Departamenti, Təlim, Tədris və Sertifikatlaşdırma İdarəsi, eləcə də Dənizdə insan həyatının mühafizəsi üzrə təlim mərkəzinin nümayəndələri iştirak etmişlər.

Seçim zamanı namizədlərin fiziki göstəriciləri, üzgüçülük qabiliyyətləri, barofunksiya və digər bacarıqları yoxlanılmışdır. Respublikamızda ilk dəfə olaraq Azərbaycan Respublikası Dövlət Dəniz Administrasiyasının və Rusiya Federasiyası  Dəniz Gəmiçiliyinin nümayəndəliyi ilə razılaşdırılaraq Təlim mərkəzində “Suda üzən gəmi və hidrotexniki qurğuların sualtı hissəsinin şəhadətləndirilməsini təmin edən dalğıc-mütəxəssis” hazırlıq kursunun təşkil olunması üçün proqram hazırlanmış və təsdiq edilmişdir.

 Samirə ƏLİYEVA,
“Xalq qəzeti”