Gəncədə yeraltı fayton yollarını bərpa etmək üçün ABŞ-dan robotlar gətiriləcək. Bu barədə APA-nın qərb bürosuna Gəncə Regional Elmi Mərkəzinin direktor müavini Samir Pişnamazzadə məlumat vermişdir.

Onun sözlərinə görə, bununla bağlı ABŞ-ın Smitsan İnstitutunun Milli Muzeyinin rəhbəri Pol Maykl Teylor Gəncədə səfərdə olmuşdur. O, Gəncə Şəhər İcra Hakimiyyətinin başçısı Elmar Vəliyev və Gəncə Regional Elmi Mərkəzinin direktoru Fuad Əliyevlə görüşmüşdür. Görüşlər zamanı bu məsələ müzakirə olunmuşdur. Hazırda yolların bərpasında robotların iştirakı ilə bağlı layihə hazırlanmışdır və qonaq onun Vaşinqtonda müzakirəsini təşkil edəcək. Layihə qəbul edilərsə, bu ilin ortalarında bərpa işlərinə başlanıla bilər.

Qeyd edək ki, Gəncədə yeraltı fayton yollarının muzey kimi bərpası planlaşdırılır. Bu istiqamətdə aparılan tədqiqat işləri nəticəsində şəhərdəki bütün yeraltı yolların xəritəsi hazırlanmışdır. Bu tunellərdə tarixi muzeyin yaradılması üçün Gəncə Regional Elmi Mərkəzinin Arxeologiya və Etnoqrafiya şöbəsi tərəfindən lazımi inventar və əşyalar da artıq toplanmışdır. Yolların tikintisi ilə bağlı bir çox işlər də görülür. Lakin S.Pişnamazzadə bunun təhlükəli bir proses olduğunu və ona görə də bu işdə robotlardan istifadə edilməsinin planlaşdırıldığını bildirmişdir.

Qeyd edək ki, yeraltı yollar şəhərin üç istiqamətində uzanaraq, Yeni Gəncə yaşayış massivini İmamzadə kompleksi ilə birləşdirir.