Azərbaycanın Tacikistandakı səfiri Abbasəli Həsənov Tacikistan Müsəlmanları idarəsinin sədri, müfti Saidmukarram Abdulkodirzodə ilə görüşündə ölkələrimizin müvafiq qurumları arasında əlaqələrin genişləndirilməsi məsələlərini müzakirə etmişdir.

A.Həsənov Qafqaz Müsəlmanları İdarəsinin sədri, şeyxülislam Allahşükür Paşazadənin salamlarını S.Abdilkodirzodəyə çatdırmış, ona bu il aprelin 16-17-də Bakıda keçiriləcək “MDB ölkələrinin müsəlmanları: sülh və əmin-amanlıq uğrunda” adlı konfransa dəvəti  təqdim etmişdir.

Ermənistan-Azərbaycan, Dağlıq Qarabağ münaqişəsinə toxunan səfir münaqişənin yaranması səbəbləri haqqında danışmış, ermənilərin törətdikləri vəhşiliklər, Xocalı soyqırımı barədə məlumat vermişdir. Diplomat qeyd etmişdir ki, bəzi müsəlman ölkələrində, o cümlədən Tacikistanda Xocalı faciəsi haqqında məlumatın az olması xoşagəlməz haldır.

Sonda ölkələrimizin dini qurumları arasında qarşılıqlı dəstəyin və əməkdaşlığın vacibliyi bir daha vurğulanmışdır.

Qulu KƏNGƏRLİ
AzərTAc-ın xüsusi müxbiri
Düşənbə