Azərbaycanın Braziliyadakı səfiri Elnur Sultanov bu ölkənin ictimai teleradio və xəbərlər yayımı qurumu olan Braziliya Kommunikasiya Şirkətinin (EBC- www.ebc.com.br)  prezidenti Nelson Breve və baş direktor Eduardo Kastro ilə görüşmüşdür.

Azərbaycanın Braziliyadakı səfirliyindən verilən məlumata görə,  görüşdə EBC ilə səfirlik və Azərbaycan Dövlət Teleqraf Agentliyi (AzərTAc) arasında tərəfdaşlıq əlaqələrinin qurulmasına dair müzakirələr aparılmışdır.

Görüşdə E.Sultanov Azərbaycan-Braziliya əlaqələrinin perspektivləri, ölkələrimiz arasında informasiya mübadiləsinin inkişafı barədə danışmışdır. Diplomat Azərbaycan haqqında dəqiq məlumatların Braziliyada geniş yayılmasının vacibliyini vurğulamışdır.

EBC-in prezidenti Nelson Breve rəhbərlik etdiyi qurumun dünyanın bir neçə informasiya agentlikləri ilə əməkdaşlıq etdiyini, AzərTAc ilə də əlaqələrin qurulmasında maraqlı olduğunu demişdir. N.Breve bunun üçün hazırlanmış sənəd layihəsinin ölkəmizin diplomatik nümayəndəliyinə göndəriləcəyini diqqətə çatdırmışdır.

Səfir E.Sultanov Azərbaycanın son illər bir çox beynəlxalq tədbirlərə evsahibliyi etdiyini və gələcəkdə də bu cür mühüm tədbirlərin həyata keçiriləcəyini bildirmişdir. Diplomat keçiriləcək tədbirlərin EBC tərəfindən işıqlandırılmasını təklif etmişdir.

Sonda qonaqlara Azərbaycanın siyasəti, tarixi, mədəniyyəti, incəsənəti, turizm potensialı və digər mövzulara dair nəşrlər təqdim olunmuşdur. 

AzərTAc