İyulun 2-də Azərbaycan Ali Məhkəməsinin bir qrup hakimi pensiyaya yola salınmışdır. Bu münasibətlə təntənəli mərasim keçirilmişdir.
AzərTAc xəbər verir ki, mərasimi giriş sözü ilə açan Ali Məhkəmənin sədri Ramiz Rzayev qeyd etmişdir ki, pensiyaya yola salınan hakimlər həm sovet dövründə, həm də müstəqillik illərində fəaliyyət göstərmişlər. Onların hər biri ulu öndər Heydər Əliyevin təqdimatı ilə Ali Məhkəmənin hakimi təyin olunmuşdur. Nəriman Hüseynov, Oqtay Maqsudov, Müzəffər Ağazadə, Vidadi Həşimov və Günəş Xudaverdiyevanın əməyi dövlətimiz tərəfindən yüksək qiymətləndirilmişdir, onların dördü Azərbaycan Respublikasının əməkdar hüquqşünasıdır.
Mərasimdə Ali Məhkəməyə yeni təyin olunan hakimlər kollektivə təqdim edilmişdir. R.Rzayev onlara tövsiyələrini vermişdir.
Qeyd olunmuşdur ki, hakim müstəqil və ədalətli olmalı, şəffaf fəaliyyət göstərməli, cəmiyyətin məhkəmələrə olan inamının artmasına çalışmalıdır.
Mərasimdə Məhkəmə-Hüquq Şurasının sədri, ədliyyə naziri Fikrət Məmmədov, baş prokuror Zakir Qaralov, Prezident Administrasiyası hüquq mühafizə orqanları ilə iş şöbəsinin müdiri Fuad Ələsgərov çıxış edərək pensiyaya yola salınan hakimlərə uzun müddət ədalət mühakiməsini yüksək səviyyədə həyata keçirdiklərinə görə təşəkkür etmiş, onlara uzun ömür arzulamışlar.
Pensiyaçı hakimlər əməklərinə verilən yüksək qiymətə, göstərilən diqqət və qayğıya görə dövlətimizə, Azərbaycan Respublikasının Prezidenti İlham Əliyevə minnətdarlıqlarını bildirmişlər.
AzərTAc