Hakimlərin Seçki Komitəsindən bildirmişlər ki, qurumun növbəti iclasında test üsulu ilə, habelə yazılı və şifahi imtahanlardan müvəffəqiyyətlə keçmiş 80 nəfər hakimliyə namizədin hakim vəzifəsinə hazırlanmaları üçün 2009/2010-cu tədris ilində təşkil edilmiş kursun nəticələri ilə bağlı məlumat dinlənilmişdir.
Bildirilmişdir ki, kurs çərçivəsində namizədlərin hakim olmaq üçün lazımi biliyə və peşə hazırlığına yiyələnmələrinə xüsusi diqqət yetirilmiş, insan haqlarının müdafiəsi, insan hüquqları üzrə Avropa Məhkəməsinin presedent hüququ, məhkəmə etikası, inzibati ədliyyə, korrupsiyaya qarşı mübarizə və digər aktual məsələlərə dair nüfuzlu beynəlxalq ekspertlərin iştirakı ilə ayrıca təlimlər keçirilmiş, məhkəmələrdə, o cümlədən bütün namizədlər üçün xaricdə stajkeçmə təşkil olunmuşdur.
İclasda tədris kursunun müvəffəqiyyətlə başa çatması vurğulanaraq onun nəticələri üzrə namizədlərlə şəffaf şəraitdə, müşahidəçilərin iştirakı ilə yazılı imtahanın keçirilməsi məsələlərinə baxılmış və imtahanın iyulun 10-da saat 10.00-da vahid auditoriyada - Azərbaycan Texniki Universitetinin idman zalında təşkili məqbul bilinmişdir.{nl}

AzərTAc