Bu il yanvarın 23-də İsmayıllıda baş vermiş insident və bəzi destruktiv qrupların bu hadisəni siyasiləşdirmək, rayonda ictimai-siyasi sabitliyi pozmaq, dövlət orqanlarının fəaliyyətini iflic vəziyyətə salmaq cəhdlərinin qarşısının qətiyyətlə alınması əyani şəkildə təsdiq etdi ki, Azərbaycan dövlətçiliyinə sadiqliyi ilə seçilən və qanunçuluğa hörmət bəsləyən İsmayıllı əhalisi heç vaxt dağıdıcı qüvvələrə meydan verməyəcəkdir.

Azərbaycanın inkişafından, beynəlxalq nüfuzunun yüksəlməsindən narahat olan bəzi daxili destruktiv qruplar və xarici anti-Azərbaycan dairələr təəssüf ki, öz təxribatçı fəaliyyətini davam etdirir, müxtəlif vasitələrlə məkrli niyyətlərini reallaşdırmağa çalışırlar. Bu gün Rusiya Federasiyasının və Azərbaycanın bəzi kütləvi informasiya vasitələri guya İsmayıllı rayonunda yaşayan rus əhalinin, konkret olaraq, İvanovka kəndinin sakinlərinin sıxışdırılması, onların hüquqlarının pozulması və s. həqiqətə uyğun olmayan, tam yalan və qərəzli məlumat yaymışlar.

Bununla əlaqədar bildiririk ki, Azərbaycan xalqı həmişə öz tolerantlığı ilə seçilmiş, ölkəmizdə mövcud olan birgəyaşayış modeli bütün dünyada nümunə kimi qəbul olunmuşdur. Ölkəmizin hər yerində olduğu kimi, İsmayıllı rayonunda bir sıra xalqların nümayəndələri olduqca mehriban, qarşılıqlı hörmət şəraitində yaşayır, bu günə kimi onlara qarşı hər hansı ayrı-seçkilik halı müşahidə olunmamış, mövcud problemlərinin həlli üçün zəruri tədbirlər görülmüşdür. Buna görə də müxtəlif maraqlı dairələrin belə dezinformasiyalarla Azərbaycanda və ya onun ayrı-ayrı bölgələrində vəziyyəti gərginləşdirmək, milli ayrı-seçkilik toxumu səpmək cəhdləri heç vaxt baş tutmayacaqdır.