Gənclər və İdman Nazirliyindən aldığımız məlumatda bildirilir ki, nazirlik orduda xidmət edən gənclərin asudə vaxtının səmərəli təşkili, onların mənəvi-psixoloji və fiziki hazırlığının yüksəldilməsi məqsədi ilə hərbi hissələrdə ali və orta ixtisas təhsili müəssisələrinin tələbələri və yaradıcı gənclərinin iştirakı ilə mütəmadi olaraq görüşlər keçirir.

Növbəti belə görüşlərdən birinin 2013-cü il yanvarın 29-da  bir qrup ali və orta ixtisas təhsili müəssisələrinin tələbələrindən, yaradıcı gənclərdən ibarət heyətin iştirakı ilə fevralın 2-də Azərbaycan gəncləri günü münasibəti ilə Goranboy rayonu ərazisində yerləşən “N” saylı hərbi hissədə  keçirilməsi nəzərdə tutulur.

Tədbirin keçirilməsində əsas məqsəd, cəbhə bölgəsində xidmət edən gənclərin mənəvi-psixoloji durumunun yüksəldilməsinə və asudə vaxtlarının səmərəli təşkilinə kömək etməkdir.

Görüş zamanı hərbi hissədə xidmət edən əsgər və zabit heyəti qarşısında yaradıcı və istedadlı tələbələrin iştirakı ilə konsert proqramı təşkil ediləcək, hərbi xidmətdə fərqlənən bir qrup gizir və əsgərə Gənclər və İdman Nazirliyinin diplom və xatirə hədiyyələri veriləcək.

“Xalq qəzeti”